У пятніцу, 18 кастрычніка, прадстаўнікі працоўных калектываў Петрыкаўшчыны прыбылі ў Калінкавіцкі раён, каб дапамагчы лесаводам у аднаўленні ляснога фонду, які пацярпеў ад ураганнага ветру, у рамках акцыі “Дай лесу новае жыццё”.
У якасці арганізатара паездкі на пасадку лесакультур выступіў Нацыянальны парк “Прыпяцкі”, да працаўнікоў прыродаахоўнай установы далучыўся і дзясятак актывістаў БРСМ і работнікаў з Раённых электрычных сетак, газавай службы і Цэнтра гігіены і эпідэміялогіі. Усяго ж паўсотні землякоў давалі ў той дзень жыццё маладым дрэўцам.
Аўтобусы прыпыніліся ў некалькіх кіламетрах на поўнач ад аграгарадка Малыя Аўцюкі. Спачатку ўсіх, хто ў той дзень працаваў на дзялянцы, чакаў інструктаж па тэхніцы бяспекі і наглядныя прыклады з тлумачэннямі таго, як правільна саджаць хвою і бярозу. Пасля інструктажу і тлумачэнняў, землякі прыступілі да пасадкі лесу.
Агульная плошча дзялянкі складала звыш 7 гектараў. Да ўчастку было дастаўлена каля 60 тысяч дрэў, з якіх 45 тысяч склала хвоя і 15 тысяч – бярозы.
Хоць перад пачаткам работ лесаводы адзначылі, што ў першую чаргу трэба забяспечыць якасць, а не колькасць пасадкі, землякі спраўляліся з задачай бадзёра. Пакуль адны саджалі хвою, іншыя давалі жыццё бярозе. Лесагаспадарчая тэхніка Калінкавіччыны працавала недалёка – трактары гудзелі на перыферыі дзялянкі і заканчвалі ачыстку ўчастку ад буралому.
Праз некалькі гадзін працаўнікоў чакаў смачны абед, арганізаваны нацыянальным паркам.
Не менш плённай была і пасляабедзенная праца, калі былі дасаджаны незанятыя рады бярозы і землякі завяршылі пасадку на сваіх участках. Так, удзельнік акцыі, начальнік навуковага аддзела нацыянальнага парку Міхаіл Пасмурцаў адзначыў:
– Лічу, што высаджванне лесу і дапамога калегам – наш абавязак, бо ніхто не застрахаваны ад свавольстваў стыхіі. Тым больш, што беларусы заўсёды вызначаліся сваёй згуртаванасцю і асаблівым пачуццём узаемадапамогі. Упэўнены, што ў падобнай сітуацыі нашыя калегі таксама не пакінулі нас сам-насам з наступствамі ўрагану.
Акрамя гэтага, папрацаваць на ўлонні прыроды – карысна для здароўя, асабліва для тых людзей, што праводзяць шмат працоўнага часу ў кабінетах.
Падзякавала ўсім, хто ўзяў удзел у мерапрыемстве, намеснік генеральнага дырэктара па ідэалагічнай рабоце нацпарку “Прыпяцкі” Святлана Швец: “Мы ўдзячныя ўсім, хто вырашыў далучыцца да нашай ініцыятывы дапамагчы калегам з Калінкавіцкага раёна ў рамках рэспубліканскай акцыі “Дай лесу новае жыццё!”.
Вельмі прыемна, што ў справе аднаўлення ляснога фонду актыўна праявіла сябе моладзь, бо захаванне нашай прыроднай спадчыны, гэта істотны ўнёсак у будучыню экалагічнай бяспекі нашай Беларусі”.
Арцём ГУСЕЎ.
Фота аўтара.
Оставить комментарий