27 лістапада на базе Петрыкаўскай раённай бібліятэкі прайшла дыялогавая пляцоўка, прымеркаваная да 180-годдзя з дня нараджэння легендарнага партызана.
Тэма сустрэчы – “Дзед Талаш – сімвал беларускага патрыятызму”.
Удзельнікамі дыялогу сталі дэпутат Палаты прадстаўнікоў Нацыянальнага сходу Рэспублікі Беларусь Святлана Сянько, настаўнік гісторыі, краязнаўца Жанна Парфіевіч, навуковы супрацоўнік Петрыкаўскага гісторыка-краязнаўчага музея Галіна Занкевіч.
У нашай краіне асаблівая ўвага надаецца тэме патрыятызму. Сучаснаму грамадству патрэбны інтэлектуальна і духоўна развітыя людзі, якія любяць сваю Радзіму. Менавіта такім чалавекам некалі быў Васіль Ісакавіч.
На сустрэчы ўдзельнікі абмеркавалі важныя пытанні: у чым жа заключаўся патрыятызм Дзеда Талаша, якімі якасцямі ён валодаў і чаму мы лічым яго патрыётам, які след пакінуў пасля сябе ў гісторыі і жыцці.
“Васіль Ісакавіч Талаш – удзельнік партызанскага руху ў гады польска-савецкай і Вялікай Айчыннай войнаў на тэрыторыі Беларусі. Яго асоба адлюстроўвае беларускі нацыянальны характар на прасторы вельмі няпростага гістарычнага часу для нашай краіны. Упэўнена, што амаль у кожным жыхары нашай краіны знойдуцца рысы Дзеда Талаша. На прыкладзе легендарнага партызана можна зрабіць вынікі, што стаць героем ніколі не позна – і ў 75, і нават у 95 гадоў” – адзначыла ў сваёй прамове Галіна Уладзіславаўна.
Як вядома, у сям’і Васіля Ісакавіча і яго жонкі Пелагеі нарадзілася 13 дзяцей, але, на жаль, у жывых засталося толькі пяцёра. Як жа зараз жывуць нашчадкі Дзеда Талаша і што пра іх вядома? Пра гэта ўдзельнікам мерапрыемства паведаміла Жанна Міхайлаўна: “З генеалагічнага дрэва Васіля Талаша відаць, што лёс дзяцей патрызана няпросты: тры дачкі рана выйшлі замуж, адна з іх памерла ва ўзросте 25-ці гадоў, пакінуўшы пасля сябе адзіную дачку, якую забраў да сябе і выхоўваў Дзед Талаш. Сыны засталіся на малой радзіме і працавалі на яе карысць. Жонка Пелагея рана памерла, таму Васілю Ісакавічу прыйшлося выхоўваць дзяцей аднаму. Свае добрае імя Дзед Талаш перадаў сваім унукам і праўнукам, якія насілі яго з гонарам” .
З завяршальным словам выступіла дэпутат Палаты прадстаўнікоў Нацыянальнага сходу Рэспублікі Беларусь Святлана Сянько:
– Тэма нашай дыялогавай пляцоўкі вельмі актуальна. Васіль Ісакавіч Талаш – гэта яркі прыклад патрыятызму. Лічу, што кожны жыхар нашай краіны павінен ведаць пра гераізм Дзеда Талаша і абавязкова наведаць музей у Навасёлках. Хацелася б зараз параўнаць мінулае і сучаснае. У нас, на самой справе, цудоўная моладзь, я упэўнена, што большасць з вас сапраўдныя патрыёты сваёй краіны. Менавіта на прыкладзе нашага легендарнага героя павінна выхоўвацца маладое пакаленне і перадаваць свае веды дзецям, унукам, праўнукам. Акрамя патрыятызму, Дзед Талаш паказаў нам і важнасць сямейных каштоўнасцей на прыкладзе сваёй сям’і.
Скончылася мерапрыемства ускладаннем кветак і вянка да помніка Дзеду Талашу.
Анастасія КІСЕЛЕВА.
Фота аўтара.
Оставить комментарий