Ветэраны спорту паказалі годны ўзровень!

У першую нядзелю жніўня на базе фізкультурна-аздараўленчай залы былі праведзены 2 спартыўныя раённыя мерапрыемствы. Першае – 3-ці раённы турнір па більярдзе сярод ветэранаў фізічнай культуры і спорту ў гонар распачынальніка гэтага класічнага віду спорту Ігара Васільевіча Шастапалава. Другое – турнір па шахматам.

Трэба адзначыць, што на гэты раз свае здольнасці вырашылі прадэманстраваць 13 чалавек паважанага ўзросту. Перад пачаткам спаборніцтваў удзельнікам была прапанавана ўрачыстая частка, дзе са сваім словам выступіў намеснік старшыні раённага Савета ветэранаў Мікалай Жукоўскі.

Шляхам жараб’ёўкі ўдзельнікі падзяліліся на 4 падгрупы. Гульні праходзілі па кругавой сістэме з рэгламентам абмежавання часу на партыю – 15 хвілін. У 3-х першых групах было па 3 удзельнікі,  у чацвёртай – 4. У першай падгрупе перамогу святкаваў аўтар радкоў, у другой – Уладзімір Міцкевіч, у трэцяй – Юрый Юніцкі, у чацвёртай – Аляксандр Ліпінскі. Паўфінальныя пары склаліся наступныя: Каюкала-Міцкевіч і Ліпінскі-Юніцкі. Першае месца ў гэты дзень было за Аляксандрам Ліпінскім, другое дасталося аўтару радкоў, трэцяе – Уладзіміру Міцкевічу. Ва ўрачыстай абстаноўцы дырэктар ДЮСШ Валянціна Урбанчык і галоўны суддзя турніра Жан Дубіна ўзнагародзілі пераможцаў спаборніцтва.

У заключэнне більярднага турніру хочацца адзначыць высокі ўзровень падрыхтоўкі ветэранаў. Турнір працягваўся дастаткова доўга, больш за 4 гадзіны, было сыграна 19 спарынгаў, што патрабавала дастаткова сіл і здароўя.

Зусім іншы від спорту чакаў удзельнікаў далей, але ўжо больш інтэлектуальны – шахматы. Толькі 3 каманды вызначалі мацнейшага. Гэта каманды раённага Савета ветэранаў ГА “Ветэраны фізічнай культуры і спорту Петрыкаўскага раёна” і Петрыкаўскага РАУС. Удзельнікаў спаборніцтва па шахматам аказалася значна менш, чым у актыўных дысцыплінах. Магчыма, інтэлектуальны від спорту стаў менш прывабліваць людзей, бо састаў каманды налічваў усяго 2 чалавекі: 1 мужчыну і 1 жанчыну. Першая прыступка п’едэсталу скарылася камандзе раённага Савета ветэранаў: Раісе Будзіловіч і Уладзіміру Літошу.

Набліжаецца другая субота жніўня. Менавіта ў гэтую суботу за савецкім часам адзначалася прафесійнае свята – Дзень работнікаў фізічнай культуры. Гэты дзень асацыіраваўся ў кожнага з маладосцю, здароўем і сілай.

Аляксей Каюкала.