У разгары вясенне-палявыя работы і адна з першасных задач аграрыяў – сяўба кукурузы. Каб высветліць, як праходзіць гэты працэс, мы наведаліся ў ААТ “Чалюшчавічы”.
На шляху да палеткаў, дзе працуюць механізатары, дырэктар гаспадаркі Сяргей Ракіцкі ўвёў у курс справы: “Сёлета пад кукурузу ў нашым сяльгаспрадпрыемстве адведзена 4 тысячы гектараў пасяўной плошчы. У прыватнасці, пад зерне будзе занята каля тысячы гектараў. Раней да сяўбы кукурузы было прыцягнута тры механізатары, з 11 мая, перачакаўшы пахаладанні, да іх далучыліся яшчэ два сейбіты.
Задача на адзінку тэхнікі, абсталяванай мазырскай сеялкай “ТСМ-8000” – 25 гектараў на дзень. Але нашыя трактарысты падыходзяць да справы адказна і часцяком сеюць за працоўны дзень да 30 гектараў. Яшчэ адзін пасяўны агрэгат дазваляе ажыццяўляць сяўбу на плошчы ў 50 гектараў на дзень. Такім чынам атрымліваецца: штодня насенне кукурузы трапляе ў глебу плошчай каля 125-ці гектараў.
Што тычыцца насення, то яго мы набывалі, у пераважнай большасці, у СВК “Дружба-Аўцюкі”. Гэта адно з двух прадпрыемстваў вобласці, што спецыялізуецца на вытворчасці насення кукурузы. Восьмую частку насенневага матэрыялу мы набывалі ў замежных вытворцаў, у тым ліку і французскіх, – яно будзе закладзена на 500-ах гектарах зямлі для параўнання ўраджайнасці”, – распавёў Сяргей Мікалаевіч.
Размаўляючы пра ранейшы намалот кукурузы (а ў мінулым годзе пад культуру было вызначана пасяўной плошчы на 500 гектараў менш, чым у гэтым), кіраўнік ААТ “Чалюшчавічы” адзначыў, што закладзеная летась зялёная маса поўнасцю забяспечыла патрэбы гаспадаркі ў кармах. Больш за тое, каля 2-х тысяч тон сіласу можна рэалізаваць.
Пашырэнне ж плошчаў пад сяўбу кукурузы – рашэнне стратэгічнае. Напачатку наступнага месяца, на месцы былой фермы ў аграгарадку Колкі, гаспадарка пачне будаваць адкормачную пляцоўку для быкоў, разлічаную на 2200 галоў – адпаведна і кармавую базу трэба ўзбуйняць. Словам, сяльгаспрадпрыемства разлічвае назапасіць за гэты сезон каля 60 тысяч тон зялёнай масы.
Легкавік прыпыняецца каля палетку на захад ад Чалюшчавічаў. Недалёка, на падрыхтоўцы глебы да сяўбы “царыцы палёў” працуе энергаёмісты трактар. Бліз далягляду, па невялікім воблачку пылу, заўважаем яшчэ аднаго “жалезнага каня” беларускай вытворчасці, занятага на сяўбе. Тут шчыруюць перадавікі вытворчасці сельскагаспадарчай галіны раёна Уладзімір Козінец і Мікалай Саурын.
Па выніках мінулага года Уладзімір Уладзіміравіч атрымаў 10956 гектараў гадавой выпрацоўкі ў эталонных гектарах на трактар з магутнасцю рухавіка звыш 240 конскіх сіл. Мужчына пачынае размову сціпла: “Я дакладна ўжо не згадаю вынікі сваёй працы за мінулы сезон, бо зараз усе мы клапоцімся пра надзённыя задачы. Штодзень я рыхтую 30-35 гектараў глебы пад сяўбу кукурузы. Працую на МТЗ “Беларус”-3522 з турэцкім агрэгатам беларускай вытворчасці “VGT-100”. Гэтай прычапной дыскавай баране, па маім перакананні, няма роўных на стырне і яна выдатна паказвае сябе на ворыве пры належным наладжванні”, – адзначыў хлебароб.
Уладзімір Козінец заўважыў, што ў гэтым годзе споўнілася 30 гадоў яго працоўнай дзейнасці, як кажуць, з адным запісам у працоўнай кніжцы. “Усё жыццё я працую ў адной гаспадарцы. Вядома, былі розныя прапановы, але я звыкся з працай, аблюбаваў гэтыя палеткі. Тут працавалі мае бацькі, таму і сяльгаспрадпрыемства шчыра лічу сваім, родным”, – падзяліўся мужчына.
На падрыхтаванай глебе зай-маецца сяўбой кукурузы Мікалай Саўрын, які аддаў сельскай гаспадарцы 36 гадоў свайго жыцця. Спачатку працаваў у галіне меліярацыі, потым шчыраваў у гаспадарцы “Радзіма” у Калінкавіцкім раёне, і пусціў карані на Петрыкаўшчыне, дзе бесперапынна працуе да гэтага часу.
“Працую на МТЗ “Беларус” 2022.3 з мазырскай сеялкай ТСМ-8000. Нараканняў на тэхніку няма, у дзень засяваю ад 25 да 30 гектараў. Працую з сёмай гадзіны раніцы і да прыцемкаў”, – распавёў аграрый.
Мікалай Мікалаевіч па выніках мінулага года атрымаў пачэснае званне перадавіка, атрымаўшы 5089 гектараў гадавой выпрацоўкі ў эталонных гектарах на трактар з магутнасцю рухавіка да 240 конскіх сіл. Па словах мужчыны, ніякага сакрэту ў справе няма: “Як і ў кожнай прафесіі, галоўныя складальнікі – гэта стараннасць, адказнасць, увага і адданасць. Усяму астатняму можна навучыцца, тым больш што зараз працаваць, на мой погляд, прасцей: істотна падняліся заробкі і электроніка заўсёды падказвае, як на вызначаным палетку трэба наладзіць агрэгат”, – рэзюмаваў Мікалай Саурын.
Арцём ГУСЕЎ,
фота аўтара.
Оставить комментарий