У Петрыкаўскім раённым цэнтры карэкцыйна-развіваючага навучання і рэабілітацыі праходзіць выстава творчых работ дзяцей з асаблівасцямі псіхафізічнага развіцця, дзяцей інвалідаў Петрыкаўскага раёна пад назвай “Прыгажосць жыве паўсюль”.
– Сёлета на выставе можна ўбачыць работы дзяцей з дашкольных устаноў адукацыі і сярэдніх школ раёна, ЦКРНіР, – паведаміла ў час размовы намеснік дырэктара ўстановы Наталля Дворнік. – Вядома ж, дзецям у стварэнні работ дапамагалі бацькі, педагогі. Як бачыце, – кожная з іх па-асабліваму прыгожая. Мы рады, што тэма адгукнулася ў сэрцах дзяцей з асаблівасцямі.
Наталля Віктараўна адзначыла, што праз творчасць спецыялісты Цэнтра развіваюць у дзяцей пачуццё прыгажосці, вучаць заўважаць незвычайнае ў звычайных рэчах. Выстава праходзіць штогод у сакавіку-красавіку месяцы, падчас падрыхтоўкі якой дзеці дэманструюць свае здольнасці і фантазію.
Кідаецца ў вочы, што работы выкананы ў розных тэхніках, у вырабах выкарыстаны падручныя матэрыялы. Прысутнічаюць падзелкі, выкананыя ў тэхніцы бісерапляцення, вышыўкі з нітак і макрамэ, з цеста. Калі гаварыць пра малюнкі, то яны створаны дзяўчынкамі і хлопчыкамі з душой і любоўю, перадаюць іх думкі, мары.
Толькі паглядзіце, колькі ў работах дзяцей яркасці, любові і пазітыву. Выстава нікога не пакіне абыякавым. Педагогі Цэнтра запрашаюць усіх жадаючых убачыць гэтую прыгажосць на свае вочы.
Выстава будзе працаваць да 14 красавіка.
Святлана СОБАЛЕВА,
фота аўтара.
Оставить комментарий