Напярэдадні Дня Абаронцаў Айчыны і Узброеных Сіл Рэспублікі Беларусь спартыўная зала ўстановы “Дзіцяча-юнацкая спартыўная школа Петрыкаўскага раёна” стала пляцоўкай правядзення турніру па валейболе сярод мужчынскіх каманд, прысвечанага святу мужных, моцных і адважных.
Аматары здаровага ладу жыцця і спорту Петрыкаўшычы прадэманстравалі выдатную фізічную падрыхтоўку, спартыўны энтузіязм і волю да перамогі. Спаборніцтвы традыцыйна пачаліся з урачыстай часткі, дзе прагучалі словы падзякі ў адрас абаронцаў Айчыны. У час турніру балельшчыкі актыўна падтрымлівалі каманды, што стварала неверагодную атмасферу адзінства і згуртаванасці. Кожная падача, кожны блок, кожнае выніковае трапленне выклікалі буру эмоцый. Гульня выдалася напружанай і захапляльнай. Усе каманды годна змагаліся за перамогу.
У турніры прынялі ўдзел шэсць валейбольных дружын Петрыкаўшчыны: ВК “Рысь”, Сярэдняя школа №1, зборная каманда “Брынёў”, “Капцэвіцкая сярэдняя школа”, РАУС і Петрыкаўскі лясгас.
Валейбалісты каманды “Рысь” сталі пераможцамі турніру, другое месца за камандай першай гарадской школы і “бронза” – за валейбалістамі з Брынёва.
Дзень абаронцаў Айчыны для ўдзельнікаў спаборніцтва прайшоў у духу здаровага ладу жыцця. А спорт, як мы ведаем, здольны натхняць, аб’ядноўваць і рабіць наша жыццё больш яркім.
Марыя ТАМКО,
фота з архіва “ДЮСШ”.
Оставить комментарий