Калі вы прагульваліся па парку, то маглі назіраць наступную карціну: з адваротнага ад параднага ўваходу ў кафэ ці рэстаран горада Петрыкава стаяць, заснежаныя, нейкія металічныя канструкцыі.
Ужо само па сабе такое складзіраванне здаецца небяспечным. Усе, канешне разумеюць, што месца за памяшканнем рэстарана адносіцца да спажыўтаварыства. Але ніяк гэта тэрыторыя не агароджана, поруч ходзяць катацца з высокага мыса дзеці, ды і так званае “завуголле” за кропкай грамадскага харчавання збірае ў вечар выхаднога дня аматараў пакурыць, што прыйшлі адпачыць у рэстаран.
Здзівіў і яшчэ адзін факт: прыгледзеўшыся, зразумеў, што металічныя канструкцыі – нішто іншае, як паліца для выязнога гандлю і асобны ценявы казырок для падобнага прыстасавання. Прыгожай гэтая паліца была раней, пафарбаваная ў шэры колер, яна выглядала сучаснай, мела казырок з полікарбаната. А зараз афарбоўку пачынае «з’ядаць» іржа, ад казырка застаўся толькі каркас, а на верхняй частцы да апошняга моманту тут звісалі буйныя ледзяшы. Што да асобна ляжачага казырка, то ён увогуле напалову патануў у снезе. Пэўна, пры такіх умовах, спецыялістам гандлю трэба будзе набываць не адзін, а два кавалкі паўпразрыстага пластыку.
У любым выпадку так складзіраваць маёмасць не варта, як з пункту гледжання бяспекі, так і гаспадарчасці, бо давядзецца ўкладаць у гэтыя простыя канструкцыі грошы і чалавечы рэсурс.
Арцём ГУСЕЎ, фота аўтара.
Оставить комментарий