14 сакавіка ў актавай зале Інстытута Следчага камітэта падведзены вынікі прававой алімпіяды на прызы Старшыні Следчага камітэта.
Сімвалічна, што напярэдадні Дня Канстытуцыі Рэспублікі Беларусь адбылося ўзнагароджанне пераможцаў і прызёраў прававой алімпіяды. Гэта знакавая падзея падкрэслівае непарыўную сувязь паміж глыбокімі ведамі законаў, асноў дзяржавы і актыўнай грамадзянскай пазіцыяй маладога пакалення. Спаборніцтва было накіравана на папулярызацыю прафесіі следчага сярод школьнікаў, а таксама на развіццё іх прававой граматнасці, лагічнага мыслення і аналітычных здольнасцей. У алімпіядзе прынялі ўдзел старшакласнікі, якія праявілі цікавасць да сферы правасуддзя і законнасці. Інтэлектуальнае спаборніцтва стала пляцоўкай для выяўлення таленавітых і перспектыўных будучых юрыстаў, даўшы ім магчымасць прадэманстраваць свае веды і навыкі. Удзел у такіх мерапрыемствах садзейнічае фарміраванню прававой культуры і павышэнню юрыдычнай граматнасці сярод моладзі, што з’яўляецца важным фактарам для пабудовы прававой дзяржавы.
Старшыня Следчага камітэта Дзмітрый Гара, вітаючы прысутных, выказаў шчырыя віншаванні ўдзельнікам алімпіяды, адзначыўшы іх поспехі.
– Перамога ў алімпіядзе – гэта не толькі прызнанне асабістых дасягненняў, але і стымул для далейшага паглыбленага вывучэння права і прымянення атрыманых ведаў на практыцы. Упэўнены, што веды і вопыт, атрыманыя ў ходзе спаборніцтваў, дапамогуць вам у далейшай прафесійнай дзейнасці і ўнясуць уклад у развіццё прававой сістэмы нашай краіны, – адзначыў Дзмітрый Юр’евіч.
Па выніках алімпіады дыпломам III ступені ў намінацыі “Прафесія – следчы” адзначана эсэ Арцёма Міхалкі, навучэнца 11 класа Сярэдняй школы № 2 горада Петрыкава, кіраўнік – Алеся Аляксандраўна Некрашэвіч, настаўнік рускай мовы і літаратуры.
Карэспандэнт “Петрыкаўскіх навін” сустрэўся з таленавітым земляком. Сваё жыццё вырашыў звязаць з працай у праваахоўных органах, таму сёлета збіраюся паступаць у Акадэмію МУС Рэспублікі Беларусь. Удзел у прававой алімпіядзе для мяне – гэта выдатная магчымасць зразумець, ці падыходзіць мне абраны накірунак. Пры падрыхтоўцы да напісання эсэ разам з педагогам вывучалі асаблівасці працы следчага, яго абавязкі, патрабаванні да прафесійных і асобасных якасцяў. У гэтым шмат дапамог следчы Петрыкаўскага РАСК Яўген Стэльмах, які распавёў аб прафесіі следчага “знутры”, – дзеліцца юнак. Удзел у прававой алімпіядзе садзейнічаў пашырэнню маіх ведаў аб прававой сістэме, аб ролі следчага ў крымінальным працэсе. Паспяховы ўдзел у алімпіядзе павысіў упэўненасць у сваіх сілах, матываваў да далейшага развіцця. Гэта не проста спаборніцтва, гэта цудоўная магчымасць праверыць свае веды, сустрэцца з прафесіяналамі і зрабіць крок да сваёй мары.
– Калі мы даведаліся аб алімпіядзе, я адразу прапанавала Арцёму паўдзельнічаць. Ён заўсёды быў захоплены правам, і я ведала, што ў яго ёсць усе шанцы, – падзялілася Алеся Аляксандраўна.– Як настаўнік, я заўсёды імкнуся да прафесійнага развіцця, такім стаў удзел у прававой алімпіядзе. Гэты вопыт здаўся не толькі цікавым, але і карысным таксама і для маёй педагагічнай дзейнасці.
Няхай гэтая перамога стане толькі пачаткам вялікага шляху Арцёма і яго настаўніка. Віншуем з узнагародай!
Марыя Тамко,
фота з архіва героя.
Оставить комментарий