Толькі наперад!

Не так даўно карэспандэнты “Петрыкаўскіх навін” наведалі палеткі ААТ “Чалюшчавічы”, каб убачыць: чым жыве гаспадарка ў гэтыя веснавыя дні.

Як падзяліўся кіраўнік гаспадаркі Сяргей Ракіцкі, поўным ходам ідуць палявыя работы: пахата, падрыхтоўка глебы, закрыццё вільгацці. З трынаццатага сакавіка аграрыі прыступілі да сяўбы аўса. У планах, пры задзейнічанні двух агрэгатаў, пасеяць тысячу гектараў дадзенай культуры на працягу дваццаці дзён. Дырэктар прадпрыемства прадаставіў магчымасць карэспандэнтам раённага выдання на свае вочы ўбачыць працу аграрыяў. Так, пасля падкормкі азімага рапсу выраблялася апрацоўка вадкімі касамі азімых зерневых (на фота). Праехаўшы далей па палетках, заўважылі атрад з чатырох адзінак тэхнікі па вывазу арганікі. Як адзначыў Сяргей Мікалаевіч, у змену брыгада ўносіць ад тысячы да паўтары тысячы тон арганікі. Пастаўлена задача ўнесці 60 тон арганікі пад кукурузу, пад пасеў якой запланавана плошча больш чатырох тысяч гектараў.

Трэба адзначыць, што за апошні час многае змянілася ў гаспадарцы. Пра гэта гавораць і паказчыкі вытворчасці, і людзі, якія працуюць у ААТ “Чалюшчавічы”. І ўсе змены да лепшага: павысіліся аб’ёмы вытворчасці, як вынік – нядрэнная зарплата.
– Канечне, за паказчыкамі стаіць цяжкая праца як кіраўніцтва – наладзіць працоўную дысцыпліну, забяспечыць кадрамі, матэрыяльна-тэхнічнай базай, так і работнікаў, якія з раніцы да вечара працуюць на палях, фермах, майстэрнях, – адзначае суразмоўца. – Але ведаеце, мне здаецца, людзі ў поўнай ступені пачынаюць разумець, што на зямлі патрэбна працаваць якасна і тады ўсе старанні будуць апраўданы.
Сяргей Мікалаевіч прытрымліваецца пазіцыі – не спыняцца на дасягнутым і рухацца толькі наперад. Малады кіраўнік не хавае: на сённяшні дзень у прадпрыемства прысутнічае здаровая канкурэнцыя з УП “Палессе-Аграінвест”. І гэта цудоўна, калі работнікі ставяць перад сабой задачы не быць горшымі за іншых, а імкнуцца стаць лепшымі.
– Для выніковай працы павінны выконвацца яшчэ дзве важныя ўмовы. Першая – кадры, і гэта перш за ўсё задача кіраўніка. Не сакрэт, што некаторых людзей патрэбна навучыць “жыць” па- новаму: не спазняцца на працу, не спакушацца на дзяржаўнае, глядзець маёмасць прадпрыемства, як сваю, – працягвае кіраўнік. – Таксама важна прыцягваць маладыя сілы, і ў першую чаргу – моладзь Петрыкаўшчыны. У большасці сваёй маладыя спецыялісты з іншых рэгіёнаў пасля адпрацоўкі з’язджаюць. Я не адзін год выязджаю ў ВУЗы, СУЗы сельскагаспадарчага профілю, сустракаюся з выпускнікамі Петрыкаўшчыны для прафарыентацыі.
Суразмоўца адзначыў, што ў выніку такіх дзеянняў ў ААТ “Чалюшчавічы” на сённяшні дзень практыку праходзяць аграном, заатэхнік, два спецыялісты інжынернай службы, па размеркаванні прыйдуць тры спецыялісты інжынернай службы, заатэхнік. Ужо прыступілі да працы ветэрынарны ўрач, выпускнік Віцебскай сельгасакадэміі, і два аграномы – ураджэнцы Колак і Чалюшчавіч.
– Другі немалаважны фактар – створаныя ўмовы працы. І тут мы робім усё магчымае. Маладым спецыялістам прадастаўляецца і аплачваецца жыллё. Для работнікаў у мясцовай сталоўцы арганізаваны абед. Мучныя вырабы выпякаем самі. За абед прадпрыемства аплачвае 70% яго кошту. Выходзіць, што паўнавартаснае харчаванне каштуе каля трох рублёў, – дзеліцца кіраўнік. – З Петрыкава на працу арганізаваны падвоз: першы рэйс у 6 гадзін раніцы для механізатараў, якія працуюць у полі, для адміністрацыі – у 7.30. З нядаўняга часу ўнесены дапаўненні ў калектыўную дамову ў плане стымулюючых выплат. Нароўні з іншымі прывілегіямі абазначаны такія дні як 8 сакавіка, 23 лютага – людзям павінна надавацца матэрыяльная ўвага і ў святочныя дні. Бо добры настрой аграрыяў таксама ўплывае на будучы каравай.

Святлана СОБАЛЕВА, фота аўтара.