Нягледзячы на тое, што каляндарная зіма яшчэ трымае свае пазіцыі, у гадавальніку Петрыкаўскага лясгаса пануе сапраўдны вясновы настрой. Тут, пад чулым наглядам работнікаў галіны, адзін за адным распускаюцца яркія бутоны цюльпанаў, – прадвеснікаў доўгачаканых вясновых свят.
Кветкавая палітра: ад класікі да экзотыкі
У гэтым сезоне плануецца рэалізаваць больш за 10 тысяч цюльпанаў 20-ці гатункаў: ад далікатных белых і сонечных жоўтых да насычаных чырвоных і вытанчаных фіялетавых. Першыя кветкі, самыя нецярплівыя, ужо распусціліся.
– Заквітнела “Лалібэлла” з яе непаўторнымі чырвонымі кветкамі, а следам раскрывае свае бутоны фіялетавы “Лаптоп». У гэтым сезоне мы пастараліся максімальна пашырыць наш асартымент. Калі раней было пяць гатункаў, то зараз іх цэлых 20, – дзеліцца навінамі Юлія Макарэцкая, начальнік гадавальніка. – Сярод навінак – сорт з піёнавіднымі бутонамі (на фота), а таксама эфектныя чырвоныя і сонечныя жоўтыя з белай аблямоўкай.
Па словах суразмоўцы, можна прыехаць прама ў гадавальнік, выбраць упадабаныя цюльпаны і купіць іх на месцы.
Сакрэты майстэрства
У гадавальніку строга захоўваюць тэхналогію вырошчвання кветак: да градак падведзена спецыяльная кропельная сістэма паліву, уносяцца неабходныя ўгнаенні. Вырошчванне цюльпанаў патрабуе асаблівых умоў. Як адзначыла Юлія Уладзіміраўна, расліна не любіць як вялікага цяпла, так і маразоў, таму ў гадавальніку падтрымліваецца спецыяльная тэмпература. Бутоны абараняюцца ад залішняга сонца. Менавіта дзякуючы гэтаму, першыя кветкі ўжо цешаць вока. Па назіраннях спецыялістаў, традыцыйна самымі папулярнымі застаюцца класічныя белыя, чырвоныя і жоўтыя цюльпаны.
Даступнасць і папулярнасць
Петрыкаўскі лясгас займаецца вырошчваннем цюльпанаў ужо другі год, і попыт на кветкі нязменна высокі.
– У мінулым годзе заключалі дагаворы з прадпрыемствамі, якія куплялі кветкі для віншавання сваіх калег, а таксама актыўна супрацоўнічалі з гандлёвымі кропкамі ў Петрыкаве, – распавяла Юлія Уладзіміраўна.
Спяшайцеся, цюльпаны ўжо гатовыя адправіцца да сваіх адрасатаў. Прыемным бонусам з’яўляецца тое, што кошт кветак радуе сваёй даступнасцю.
Марыя ТАМКО,
фота аўтара.
Оставить комментарий