Апошняя нядзеля ліпеня стала знакавай не толькі для прадстаўнікоў гандлёвай галіны і тых, хто нёс службу ў ВМФ – на гарадскім пляжы № 1 прайшлі раённыя спаборніцтвы сярод прыхільнікаў пляжнага валейбола.
Перад пачаткам нашага аповеду адзначым: у адпаведным матэрыяле “Петрыкаўскіх навін” за мінулы год мы выказвалі на-дзею, што мясцовы турнір па пляжным валейболе стане адкрытым і станоўча адзначыць, што гэты аптымістычны прагноз здзейсніўся. Да пясчанай пляцоўкі ў гэты дзень завіталі дзве дружыны з Лельчыцкага раёна і гомельская каманда.
Як адзначыла, звяртаючыся да ўдзельнікаў, загадчык сектара спорту і турызму райвыканкама Алена Грэнко: “Мы аднавілі правядзенне спаборніцтваў па гэтай дысцыпліне летась – тады ў турніры ўзялі ўдзел 6 каманд. Сёлета ж мы вітаем ужо дзясятак валейбольных дружын. Пашырылася не толькі колькасць удзельнікаў, але і геаграфія мерапрыемства. Будзем спадзявацца, што і далей пляжны валейбол на Петрыкаўшчыне будзе развівацца – гасцям з суседніх рэгіёнаў мы заўсёды радыя”.
Усе валейбольныя калектывы, якія складаліся з мужчыны і жанчыны, былі падзеленыя на 3 падгрупы. У падгрупу “А” трапілі спартсмены Райжылкамунгасу, Цэнтра гігіены і эпідэміялогіі, вучні першай гарадской школы і дружына з Капцэвічаў. Менавіта дзве апошнія каманды з’яўляліся фаварытамі сваёй падгрупы: без праблем разабраўшыся з апанентамі ў дзвюх партыях, школьнікі і пасялкоўцы сышліся ў прынцыповай барацьбе, дзе запас сіл быў большы менавіта ў прадстаўнікоў юнага пакалення – 2:1 на карысць Сярэдняй школы № 1.
У падгрупе “Б” адносіны высвятлялі каманды Цэнтра па забеспячэнні дзейнасці бюджэтных арганізацый, ЦРБ і каманда з Капаткевічаў. Тут роўных не было капаткевіцкім валейбалістам, якія абыгралі абодвух сапернікаў з лікам 2:0.
Падгрупа “В” складалася з гасцей. І на гэты раз не абышлося без інтрыгі – сямейная пара каманды “Ткачэнка+1” з Гомеля на маральных здольнасцях і вопыце вырвала перамогу ў лельчыцкай дружыны з лікам 2:1 і забяспечыла сабе месца ў суперфінале. Другая ж лельчыцкая дружына не здолела ў гэты дзень забяспечыць сабе перамогу ў партыях, прайграўшы сваім землякам і гамяльчанам 0:2.
За тытул чэмпіёна турніру змагаліся вучні першай гарадской школы, валейбалісты з Капаткевічаў і Гомеля. Спачатку калектыў “Ткачэнка+1” перамог капаткевіцкую каманду, не раз злавіўшы апанентаў на іх памылках. Потым, такі ж лёс напаткаў і вучняў першай гарадской школы, якія, падавалася, не паспелі набрацца сіл і супакоіцца пасля цяжкай пераможнай сустрэчы ў сваёй падгрупе.
У выніку кубак турніру дастаўся Ірыне і Андрэю Ткачэнкам. Але пляцоўка пасля ўзнагароджання не пуставала: госці з Лельчыцкага раёна не маглі не скарыстацца магчымасцю згуляць некалькі таварыскіх партый на беразе Прыпяці, ды і навошта адмаўляць сабе ў станоўчых уражаннях?!
Арцём ГУСЕЎ.
Фота аўтара.
Оставить комментарий