Працай пакаленняў край наш знакаміты!

Святочныя мерапрыемствы ў Дзень працы завяршыліся ў летнім амфітэатры канцэртнай праграмай “Працай пакаленняў край наш знакаміты!”, у якой прынялі ўдзел кіраўніцтва раёна, прадстаўнікі дэпутацкага корпусу, працоўных калектываў, актывісты і лідары грамадскіх арганізацый і палітычных партый. Пачэсным госцем мерапрыемства была дэпутат Палаты прадстаўнікоў Нацыянальнага сходу Рэспублікі Беларусь Святлана Сянько.

Эпохі змяняюць адна адну, нараджаюцца новыя пакаленні, але як прыемна, калі старыя, добрыя святы па-ранейшаму застаюцца з намі. Па прыкладзе нашых бацькоў і дзедаў мы з радасцю і задавальненнем святкуем Першамай, віншуючы адзін аднаго з цудоўным днём Вясны, Міру і Працы.
Да прысутных на ўрачыстасці землякоў з віншавальнай прамовай звярнулася намеснік старшыні райвыканкама Наталля Ходзька:
– Імклівае 21 стагоддзе многае змяняе ў нашым жыцці, аднак светлае свята Першамая па-ранейшаму з радасцю і надзеяй сустракаюць усе, каму дарагія мінулае і будучыня Беларусі, хто сваёй працай імкнецца палепшыць яе сённяшні дзень. Свята Вясны і Працы аб’ядноўвае людзей розных прафесій, пакаленняў, усіх тых, хто клапоціцца пра маральнае і фізічнае здароўе землякоў, стварае ўмовы для годнага жыцця, дабрабыту і парадку. У нашым раёне жывуць і працуюць цудоўныя людзі – мэтанакіраваныя, працалюбівыя, якія валодаюць высокімі прафесійнымі навыкамі і шырынёй поглядаў. Са святам вас, паважаныя жыхары Петрыкаўшчыны!
Свае віншаванні землякам адрасавала і дэпутат Палаты прадстаўнікоў Нацыянальнага сходу Рэспублікі Беларусь Святлана Сянько:
– 1 Мая – свята для ўсіх, хто сваёй штодзённай працай стварае заўтрашні дзень, дбае пра росквіт і дабрабыт уласнай сям’і і краіны. І ў гэты святочны дзень я выражаю шчырую ўдзячнасць ветэранам працы – людзям, якія ўнеслі неацэнны ўклад у развіццё нашага раёна і ўсім тым, хто сёння працуе на карысць роднага краю, прымнажаючы лепшыя традыцыі сваіх папярэднікаў.
У межах канцэртнай праграмы, прымеркаванай да Дня працы, прайшло ўшанаванне актывістаў грамадскіх арганізацый і прафсаюзнага руху Петрыкаўшчыны.

Галіна КАЗАК, фота аўтара.