На мінулым тыдні старшыня раённага Савета дэпутатаў Віталій Пілер у межах вывучэння рэагавання адказных служб на хвалюючыя насельніцтва пытанні жыццядзейнасці паўторна наведаў вёску Хвойня Лучыцкага сельскага Савета.
З нешматлікім насельніцтвам Хвойні Віталій Уладзіміравіч сустракаўся два месяцы таму. Менавіта тады на сходзе грамадзян былі ўзняты некалькі праблемных момантаў, якія прыносяць вяскоўцам шэраг нязручнасцяў. Так, галоўнай праблемай усіх пражываючых і людзей, якім у сілу розных абставін даводзіцца бываць у вёсцы ці праязджаць яе, рухаючыся на Акцябрскі, з’яўляецца дарога. У хвойніцкай дарогі дзве істотныя праблемы: па прычыне штогадовых разліваў ракі Пціч, ёсць участкі, дзе дарожнае пакрыццё мае шэраг ям і выбоін, да таго ж узбочына сёлета настолькі зарасла драўняна-хмызняковай расліннасцю, што ў некалькіх месцах буйнагабарытныя аўто наўрад ці змогуць раз’ехацца.
Па запыце на імя старшыні райсавета прыйшоў адказ ад аддзела жыллёва-камунальнай гаспадаркі, архітэктуры і будаўніцтва райвыканкама, што ў маі месяцы праводзіліся работы па грэйдзіраванні і прафіліраванні. Так, праводзіліся, гэты факт пацвердзілі і мясцовыя жыхары, аднак праблема вяртаецца, таму варта сачыць за станам дарог пастаянна і падтрымліваць іх у належным стане – даручэнне Віталія Пілера адказным службам. Што да тэрмінаў ухілення і кантролю, то ўжо на гэтым тыдні старшыня райсавета з нашым карэспандэнтам паўторна наведаюць Хвойню.
Узнімалі жыхары Хвойні ў час мінулай сустрэчы са старшынёй райсавета пытанні гандлёвага і медыцынскага абслугоўвання. На сённяшні дзень усе хвалюючыя моманты вырашаны. Аўталаўка і перасоўны комплекс па графіку наведваюць населены пункт. Адзінае, на што звярнулі ўвагу вяскоўцы, гэта не заўсёды разнастайны асартымент тавараў. Зразумела, яны апошняя кропка ў маршруце аўталаўкі, і часам не ўсе тавары да іх, што называецца “даязджаюць”, аднак надалей хацелася б выключыць такія моманты.
Разам з тым, у час сустрэчы з насельніцтвам гучалі і словы падзякі ў адрас спецыялістаў і кіраўніцтва раённага цэнтра гігіены і эпідэміялогіі, якімі праведзены аналіз якасці пітной вады ў калодзежы адной з пражываючых.
Старшыня райсавета Віталій Пілер, начальнік аддзела землеўпарадкавання райвыканкама Надзея Ярмак-Будовіч, інспектар сектару нагляду і прапаганды РАНС Аляксей Гурын абмеркавалі з насельніцтвам актуальныя пытанні землекарыстання, меры прафілактыкі і сімптомы захворванняў хатніх жывёл, правілы паводзін у пажаранебяспечны перыяд. Так, грамадзянам параілі больш адказна ставіцца да пытанняў бяспекі: не распальваць вогнішчы ў ветранае надвор’е, не пакідаць без нагляду смецце, якое спальваецца, усталяваць у жылых памяшканнях аўтаномныя пажарныя апавяшчальнікі.
Удзельнікі сустрэчы абмеркавалі перспектывы развіцця раёна, у прыватнасці сельскагаспадарчай галіны, адказалі на пытанні прысутных на сустрэчы вяскоўцаў.
Галіна КАЗАК, фота аўтара.
Оставить комментарий