Выніковае ў 2024 годзе пасяджэнне раённага выканаўчага камітэта прайшло на гэтым тыдні пад старшынствам кіраўніка раёна Аляксандра Верамеева.
На разгляд і абмеркаванне былі вынесены наступныя пытанні: аб паказчыках прагнозу сацыяльна-эканамічнага развіцця Петрыкаўскага раёна на 2025 год; аб праекце раённага бюджэту на 2025 год, аб эфектыўнасці прыманых мер, накіраваных на супрацьдзеянне незаконнаму абароту наркатычных сродкаў, псіхатропных рэчываў, іх прэкурсораў і аналагаў, і вынікі работы па правядзенні праграмы “Мак” на тэрыторыі Петрыкаўскага раёна; аб эфектыўнасці дзейнасці рэдакцыі газеты “Петрыкаўскія навіны”.
Станоўчую дынаміку ў сацыяльна-эканамічным развіцці Петрыкаўшчыны, згодна праекту рашэння аблвыканкама, прызвана забяспечыць выкананне даведзеных паказчыкаў прагнозу і заданняў. Так, раёну ўстаноўлены паказчык па росце намінальнай налічанай сярэднемесячнай заработнай плаце ў памеры 110,5%. Як адзначыла ў сваім дакладзе намеснік кіраўніка раёна Аляксандра Янчанкава, выкананне паказчыка прасочваецца па ўсіх сферах. Старшыня райвыканкама Аляксандр Верамееў у чарговы раз нагадаў кіраўнікам устаноў, арганізацый і прадпрыемстваў, што пытанні рэальнай заработнай платы і павелічэнне даходаў насельніцтва застаюцца ў ліку важных і надзённых.
Што да інвестыцый у асноўны капітал, то ў 2025 годзе на тэрыторыі раёна плануюцца да рэалізацыі некалькі буйных праектаў. Так, сярод інвестпраектаў – аб’екты Петрыкаўскага РУ ААТ “Беларуськалій”: павярхоўны комплекс, расоласховішча карта №2; руднік, гарызонт “-580м” – развіццё напрамкаў – другая чарга. Асноўны інфраструктурны праект, які плануе ажыццяўляць ААТ “Беларуськалій” – будаўніцтва фізкультурна-аздараўленчага комплексу ў Петрыкаве.
Інвестыцыі ў сельскай гаспадарцы запланаваны па такіх накірунках як меліярацыя, фарміраванне асноўнага статка, закупка машын і абсталявання.
Плануецца рэалізацыя інвестпраекта на базе ААТ “Чалюшчавічы” – будаўніцтва адкормачнай пляцоўкі на 1300 галоў і двух шатроў па 600 галоў пад клеткі-домікі для маладняка БРЖ ад 0 да 3-х месяцаў і ад 3-х да 6-ці месяцаў.
Што да паказчыка вытворчасці прадукцыі ў сельскай гаспадарцы, то ён устаноўлены ў памеры 108,5%. Нямала, як адзначыў Аляксандр Верамееў, аднак з улікам сёлетніх напрацовак галіны – рэальна, калі падысці да справы з усёй адказнасцю і спрацаваць як след.
– Задачы, пастаўленыя абласным выканаўчым камітэтам, павінны быць выкананы, бо яны накіраваны, у першую чаргу, на паляпшэнне дабрабыту насельніцтва раёна, – падкрэсліў Аляксандр Верамееў.
Паказчык рознічнага тавараабароту ў мінулым годзе выкананы, спрацаваць атрымалася на 105%. На 2025 год даведзены паказчык у памеры 104,7%. Па інфармацыі намесніка старшыні Аляксандры Янчанкавай, выконваць паказчык плануецца за кошт пашырэння гандлёвай сеткі, шляхам адкрыцця новых гандлёвых аб’ектаў, у тым ліку на базе маёмасці, якая не выкарыстоўваецца, за кошт развіцця дзеючых прыватных суб’ектаў гандлю, спажывецкай кааперацыі, а таксама прыцягнення ў раён новых суб’ектаў гандлю – прадстаўнікоў буйных гандлёвых сетак, арганізацый-вытворцаў.
Таксама ў 2025 годзе плануецца правесці больш за 50 кірмашовых тэматычных мерапрыемстваў (школьныя, сельскагаспадарчыя, калядныя і навагоднія) і мерапрыемстваў стымулюючага характару: прадастаўленне зніжак, правядзенне акцый па зніжэнні цэн на тавары.
Як зазначыў у час пасяджэння Аляксандр Верамееў, каб атрымаць добры вынік, варта кожнаму кіраўніку ў поўнай меры выкарыстаць магчымасці свайго прадпрыемства.
– Усе даведзеныя прагнозныя паказчыкі і заданні ўжо ўключаны ў план сацыяльна-эканамічнага развіцця вобласці і Петрыкаўшчына павінна ўнесці свой годны ўклад у агульную капілку поспеху, – рэзюмаваў кіраўнік раёна.
Пры абмеркаванні праекту бюджэту на 2025 год, начальнік фінансавага аддзела райвыканкама Валянціна Вашкевіч паведаміла, што захоўваецца яго сацыяльная накіраванасць.
Удзельная вага галін сацыяльнай сферы ў расходах раённага бюджэту складзе 76,9 %.
Расходы на ахову здароўя вызначаны ў памеры 22657,6 тысяч рублёў. Удзельная вага галіны ў агульных расходах раённага бю-джэту на 2025 год – 24%.
Забеспячэнне функцыянавання галіны “Культура” ў агульных расходах раённага бюджэту складзе 4,6 %.
Выдаткі на адукацыю прадугледжваюцца ў памеры 43,8 % ад агульных расходаў раённага бюджэту.
Расходы бюджэту на сацыяльную палітыку на 2025 год прадугледжаны ў памеры 5,9% ад агульных расходаў.
На выплату дзяржаўнай адраснай сацыяльнай дапамогі, бясплатнае забеспячэнне прадуктамі харчавання дзяцей першых двух гадоў жыцця плануецца накіраваць 763,6 тысячы рублёў.
Галіна КАЗАК.
Фота аўтара.
Оставить комментарий