На ўрачыстасці, якая прайшла ў раённым Доме культуры з нагоды галоўнага свята аграрыяў Петрыкаўшчыны “Дажынкі-2024”, у намінацыі “Лепшы работнік сельскагаспадарчага і абслуговага прадпрыемства” падзячным лістом раённага выканаўчага камітэта і грашовай прэміяй адзначаны Юрый Мароз, трактарыст-машыніст камунальнага даччынага ўнітарнага прадпрыемства меліярацыйных сістэм “Петрыкаўскае ПМС”. Напярэдадні раённай урачыстасці мы сустрэліся з Юрыем Міхайлавічам, каб пагаварыць пра шлях у прафесію і сённяшнія поспехі.
Сустрэліся з Юрыям Марозам мы напачатку 19-й гадзіны, менавіта ў гэты час звычайна заканчваецца працоўны дзень мужчыны. Сціпла просіць прабачэнне за спазненне, і мы пачынаем размову.
Наш герой цалкам апраўдвае трапнае народнае выслоўе “дзе нарадзіўся, там і згадзіўся”: мужчына – ураджэнец вёскі Малыя Навасёлкі і не ўяўляе свайго жыцця без прыгожых навакольных пейзажаў, паўнаводнай Прыпяці, апетай народным пісьменнікам Беларусі Якубам Коласам у аповесці “Дрыгва”, прысвечанай Дзеду Талашу, легендарнаму земляку.
З малых гадоў Юрый працаваў з бацькамі на зямлі – у сям’і заўсёды трымалі вялікую гаспадарку. Таму, магчыма, і з выбарам прафесіі доўга не вагаўся: пасля заканчэння Бяланавіцкай дзевяцігодкі хлопец адвучыўся на курсах трактарыста. Працоўную дзейнасць наш герой пачаў на панэльным заводзе, адкуль і быў прызваны на тэрміновую вайсковую службу. Пасля дэмабілізацыі некаторы час працаваў у ПМК, на керамзітным заводзе і нават у прыватнай арганізацыі, аднак знайшоў сябе ў меліярацыі, і вось ужо амаль 8 гадоў працуе трактарыстам-машыністам камунальнага даччынага ўнітарнага прадпрыемства меліярацыйных сістэм “Петрыкаўскае ПМС”. Між іншым, пэўную частку працоўнай біяграфіі гэтаму прадпрыемству аддаў і бацька нашага героя.
Характарызуючы аднаго з лепшых сваіх трактарыстаў, кіраўнік КДУП МС “Петрыкаўскае ПМС” Аляксей Крупяневіч адзначыў, што мужчына вызначаецца сваёй стараннасцю і працавітасцю. Ён вопытны трактарыст, які вельмі адказна ставіцца да тэхнікі.
– Па выніках работы за 10 месяцаў, Юрый Міхайлавіч забяспечыў выкананне даведзенага задання на 122% і сваёй плённай працай заслужыў прадстаўляць наша прадпрыемства на раённых дажынках, – дадаў кіраўнік.
На пытанне, якім прафесійным клопатам жыве ў міжсезонне, наш герой распавёў, што ў асноўным ён задзейнічаны на работах па культуртэхнічнай меліярацыі земляў у сельгаспрадпрыемствах раёна. Кіраўнікі разумеюць, што сёння магчыма атрыманне больш высокіх ураджаяў, калі паляпшаць зямлю і сачыць за яе водна-паветраным рэжымам – таму і актыўна супрацоўнічаюць з меліяратарамі. Стратэгічна важны накірунак – адзін з прыярытэтаў развіцця сельскай гаспадаркі, пастаўленых кіраўніком дзяржавы.
Важнасць і адказнасць сваёй працы ў поўнай меры ўсвядамляе і наш герой. Не так даўно мужчына завяршыў запланаваныя работы на палетках ААТ “Чалюшчавічы”, на меліяратыўнай сістэме “Трэмля” і ў сельгасарганізацыі ААТ “Пціч-Агра”, на сістэмах “Лукіч” і “Бобрык”. Гэтымі днямі суразмоўца заняты на работах па культуртэхнічнай меліярацыі сістэмы “Брынёва” ААТ “Агра-Ляскавічы”.
– Ужо вывезена драўняна-хмызняковая расліннасць, праводзіцца дыскаванне глебы, наперадзе – пахата, – паведаміў у час размовы Юрый Мароз і дадаў: – Да пачатку маразоў планую завяршыць работы ў “Брынёва” і тады ўжо пачну рыхтаваць тэхніку да новага сезону. Сельскагаспадарчы год бяжыць хутка і вельмі важна рабіць усё своечасова, – разважае пра важнасць сваёй працы наш герой.
Слухаю і разумею: менавіта на такіх рупліўцах і трымаецца зладжаная работа ўсяго калектыва і агульны поспех. Жадаем Юрыю Міхайлавічу плённай працы і высокіх вытворчых паказчыкаў.
Галіна КАЗАК.
Фота аўтара.
Оставить комментарий