Дасведчаныя хлебаробы гавораць: “Мала збожжа змалаціць – яго яшчэ трэба добра высушыць і правільна захоўваць”. Гэтага правіла прытрымліваецца аператар зернесушыльнай устаноўкі СУП “Палессе-Аграінвест” Валерый Яцук, які ў бягучым сезоне на зернеачышчальна- сушыльным комплексе Рыэла перапрацаваў 2063 тоны збожжа, што дазволіла аграрыю па выніках раённага спаборніцтва заняць першае месца.
– На Пціцкі вытворчы ўчастак прыйшоў параўнальна нядаўна – каля двух гадоў таму. Да гэтага дзевятнаццаць гадоў адпрацаваў на Петрыкаўскім керамзітавым заводзе. Прызнаюся, спачатку было цяжкавата. Работа аператара зернесушыльнага комплексу падобна да працы камбайнёра: улетку да сушылкі не падысці – тут вельмі горача, – дзеліцца перадавік вытворчасці. – Сачыць за абсталяваннем неабходна ўвесь час, каб не перапаліць культуру, своечасова вызваляць ёмістасці для новых тон, якія паступаюць з поля. Сушка ўраджаю патрабуе адказных адносін і ўважлівасці. У працу ўцягнуўся хутка. Дапамаглі адаптавацца старэйшыя таварышы, кіраўніцтва.
Са слоў героя, справа на зернесушылцы яму даспадобы, калектыў прадпрыемства згуртаваны, неабходныя ўмовы створаны, і мяняць у прафесійным плане ён нічога не хоча. Наадварот, плануе замацавацца на прадпрыемстве і зараз праходзіць навучанне для атрымання спецыяльнасці аператара па пераапрацоўцы зерня.
– Напэўна, не ўсе ведаюць, чым займаюцца аператары зернесушыльных установак падчас уборачнай кампаніі, працягвае суразмоўца. – Галоўная наша задача – кантраляваць вільготнасць збожжа на ўваходзе ў сушыльны апарат, сачыць за яго станам унутры сушылкі, а таксама пераканацца ў тым, што на выхадзе ўраджай мае неабходную для захоўвання вільготнасць. Галоўнае: не перасушыць і не дапусціць перавышэння ўзроўню вільгаці.
Па словах Валерыя Мікалаевіча, для нявопытнага чалавека на першы погляд здаецца, што за працэсам давядзення ўраджаю да патрэбных параметраў адказвае аўтаматыка. Але і аператар павінен быць увесь час напагатове. Апроч цяжкай працы, рукамі трэба перасоўвацца па драбінчастых пралётах на прыстойную вышыню.
На прадпрыемстве два сушыльныя комплексы: на 30 тон, на якім працуе герой, і на 20 тон. Калега Валерыя Мікалаевіча па перапрацоўцы збожжа ў гэтым сезоне адстаў ад перадавіка не на шмат. Суразмоўца прызнаецца: у самы пік жніва прахалоджвацца мужчынам не было калі, і сёння аператарам прыемна ўсведамляць, што ў агульным караваі Петрыкаўшчыны ёсць часцінка іх працы.
– Калі гаворка ідзе пра нарыхтоўку і захоўванне вырашчанага ўраджаю, не лічышся з уласным часам. Важна клапаціцца, вобразна кажучы, аб кожным сабраным у полі зярнятку, каб у выніку атрымаць поўныя засекі, – сцвярджае Валерый Мікалаевіч. – Безумоўна, прыемна, што мае старанні адзначаны. Гэта вельмі ганарова. Але гэты вынік – згуртаваная і адданая праца ўсяго калектыву. Усе мы не дзеля ўзнагарод стараемся. Мы разумеем, наколькі важная наша праца для агульнага поспеху.
Святлана СОБАЛЕВА,
фота аўтара.
Оставить комментарий