У Саюзнай дзяржаве ўжо зроблена нямала, але неабходна працаваць далей і рабіць больш. Якім будзе гэты шлях у будучыню, абмеркавалі падчас пасяджэння Вышэйшага Дзяржаўнага Савета Саюзнай Дзяржавы ў Мінску. Пасяджэнне праходзіла пад кіраўніцтвам Прэзідэнта Беларусі, старшыні ВДС Аляксандра Лукашэнкі.
Удзел у пасяджэнні прынялі Прэзідэнт Расіі Уладзімір Пуцін, кіраўнікі ўрадаў дзвюх краін Раман Галоўчанка і Міхаіл Мішусцін, спікеры палат парламентаў Валянціна Мацвіенка, Наталля Качанава і Ігар Сергяенка, якія ўваходзяць у склад Вышэйшага дзяржсавета.
Адкрываючы пасяджэнне ў пашыраным складзе, Прэзідэнт Беларусі зрабіў акцэнт на тым, што праходзіць яно напярэдадні знакавай даты – 8 снежня адзначаецца 25-годдзе з дня падпісання Дагавора аб стварэнні Саюзнай дзяржавы. “Сёння можна ўпэўнена канстатаваць, што ў 1999 годзе наш разлік быў дакладным: толькі ў саюзнай “двойцы” мы найбольш поўна змаглі рэалізаваць увесь назапашаны вопыт і патэнцыял на прынцыпах узаемнага даверу і партнёрства, – сказаў Аляксандр Лукашэнка.
– Двухбаковыя адносіны, якія склаліся, дэманструюць магутную сілу ўзаемнага прыцягнення, якая грунтуецца на агульных мове і навукова-тэхнічнай школе, падобных ментальнасці і культурных традыцыях, нашай агульнай гісторыі. Створаны ўнікальны сусветны вопыт: “дзве краіны – дзве эканомікі – адна эканамічная прастора”. Гэты досвед правераны часам і даказаў сваю грунтоўнасць”.
Прэзідэнт Беларусі звярнуў увагу, што ва ўмовах беспрэцэдэнтнага санкцыйнага ціску захаваны базавыя галіны эканомікі, не парушана фінансавая сістэма, беспрацоўе знаходзіцца на мінімальных значэннях, даходы і зберажэнні грамадзян упэўнена растуць. “Мы не проста вытрымалі. Мы сталі мацнейшымі”, – канстатаваў беларускі лідар. У пацверджанне ён прывёў некалькі лічбаў эканамічнай статыстыкі. У параўнанні з 1999 годам значна вырас аб’ём ВУП нашых краін: у Беларусі і ў Расіі – прыкладна ў 2,5 разы. Беларуска-расійскі тавараабарот таксама паступова павялічваецца. У мінулым годзе ён дасягнуў амаль 55 мільярдаў долараў. А ў гэтым пры ўмове захавання бягучых тэмпаў росту плануецца дасягнуць 60 мільярдаў.
Разам з тым беларускі лідар са свайго боку пазначыў некалькі стратэгічных напрамкаў далейшага развіцця Саюзнай дзяржавы.
Задачай нумар адзін кіраўнік беларускай дзяржавы назваў рэалізацыю адзінай эканамічнай палітыкі і забеспячэнне роўнасці правоў грамадзян на саюзнай прасторы.
Другое: транспарт і лагістыка. Па словах Прэзідэнта, той факт, што беларускія экспартныя грузы пайшлі праз расійскія порты, прынесла ўзаемную выгаду. Але, як звярнуў увагу беларускі лідар, незадзейнічаных рэзерваў пакуль вельмi шмат. На чарзе – рэалізацыя праекта па Паўночным марскім шляху.
Трэцяе: ваенна-палітычная бяспека. Па словах Аляксандра Лукашэнкі, само жыццё прымушае нас звяртаць асаблівую ўвагу на абароназдольнасць нашых дзяржаў.
Чацвёртае: планаванне і пераразмеркаванне працоўных рэсурсаў. Па словах Кіраўніка дзяржавы, не сакрэт, што кожны год расійскі рынак працы прыцягвае значную колькасць беларусаў, што азначае недахоп працоўных рук у нас. І ў Расіі ёсць падобная праблема.
Прэзідэнт назваў важным, што ў парадку дня прысутнічае асаблівая, святая тэма святкавання 80-годдзя Перамогі ў Вялікай Айчыннай вайне. “Гэтак жа, як і нашы продкі 80 гадоў таму, 9 мая мы разам на Краснай плошчы успомнім ахвяр той страшнай вайны і адзначым важную гадавіну гістарычнай перамогі савецкага народа над фашызмам”, — сказаў ён.
Парадак дня Пасяджэння Вышэйшага дзяржаўнага савета Прэзідэнт назваў як заўсёды насычаным. Ён падкрэсліў, што ў ім канкрэтныя пытанні, якія хвалююць жыхароў нашых краін, якія даюць магчымасць палепшыць умовы функцыянавання эканомік і ўмацаваць бяспеку Беларусі і Расіі.
Галіна КАЗАК, фота БелТА.
Оставить комментарий