Напрыканцы мінулага тыдня работнікі УП “Палессе-Аграінвест” падвялі вынікі работы прадпрыемства, вынікі вытворчых спаборніцтваў у галінах раслінаводства і жывёлагадоўлі за 2024 год. Урачыстасць наведаў вядучы спецыяліст ААТ “Мазырскі НПЗ” Віктар Верамееў.
Мерапрыемства адкрыла дырэктар сельгаспрадпрыемства Алена Асадчая.
– Мінулы год стаў чарговай вяхой у развіцці прадпрыемства, часам напружанай працы ўсяго калектыву. Ад світанку да позняга вечара работнікі працавалі на палях і фермах, у рамонтных майстэрнях, пры неабходнасці – не ведаючы выхадных і святочных дзён, – адзначыла Алена Мікалаеўна. – Шмат сіл і энергіі было ўкладзена ва ўражай 2024 года. Мы змаглі дасягнуць нядрэнных паказчыкаў у рабоце, прадэманстраваўшы ўзоры прафесійнай працы.
Кіраўнік адзначыла, што прадпрыемства ў мінулым годзе ў поўным аб’ёме забяспечыла ўласнае пагалоўе жывёлы якаснымі кармамі. Нарыхтавана сенажу ў колькасці 27 тысяч тон, сіласу – 57 тысяч тон, сена –1181 тона. Намалочана 6,8 тысяч тон збожжа, што на 2,2 тысяч тон вышэй паказчыка 2023 года.
Дзякуючы добрай кармавой базе і належнай працы работнікаў у мінулым годзе было надоена 18994 тоны малака – прырост 7% да ўзроўню 2023 года. Удой на адну фуражную карову ў фізічнай вазе склаў 6960 кілаграмаў. Рэалізавана 18179 тон малака. Малако сортам “экстра” рэалізавана 99,88% ад агульнага аб’ёму рэалізаванага малака.
За 12 месяцаў мінулага года валавая вытворчасць прыбаўлення КРЖ склала 2119 тон, да ўзроўня 2023 года гэты паказчык вырас на 106% або на 121 тону. Сярэднесутачны прывес БРЖ за 2024 год у цэлым па прадпрыемству склаў 812 грамаў. За мінулы год рэалізавана 2487 тон мяса БРЖ. Валавы прывес свіней у 2024 годзе склаў 2101 тону. Сярэднесутачны прывес свіней за справаздачны перыяд склаў 673 грамы. Мяса свіней рэалізавана ў колькасці 1942 тоны. Племянных свіней рэалізавалі ў колькасці 24 тоны.
За 12 месяцаў 2024 года прадпрыемствам атрымана 45215 тысяч рублёў выручкі ад рэалізацыі прадукцыі, работ, паслуг.
Сярэднемесячная заработная плата ў параўнанні з аналагічным перыядам 2023 года вырасла на 304 рублі і склала 2024 рублі.
Таксама Алена Мікалаеўна ў сваім выступленні агучыла планы на 2025 год, падзякавала работнікам за добрасумленную працу. У час мерапрыемства дырэктар “Палессе-Аграінвест” і намеснік дырэктара па раслінаводству Іван Фешчанка ўручылі ганаровыя граматы, падзякі, грашовыя прэміі лепшым работнікам прадпрыемства. Артысты Петрыкаўшчыны разнастаілі ўрачыстае мерапрыемства творчымі нумарамі.
Святлана Собалева,
фота аўтара.
Оставить комментарий