Грунтавыя сцежкі сабралі лёгкаатлетаў!

У нядзелю, 25 жніўня, на тэрыторыі лесапаркавай зоны “Гарыцы”, адбыліся спаборніцтвы па лёгкаатлетычным кросе ў праграме ХХ раённай спартакіяды.

Згодна з палажэннем, кожная каманда складалася з двух спартсменаў – мужчыны і жанчыны. Першым належала пераадолець дыстанцыю ў 2 кіламетры, у той час як прадстаўніцы прыгожай паловы мераліся хуткасцю на адрэзку ў кіламетр.
Галоўны суддзя спаборніцтваў, трэнер-выкладчык Жан Дубіна павітаў удзельнікаў мерапрыемства, пасля чаго атлеты прайшліся па дыстанцыі. Першымі на старт выйшлі жанчыны, якія справіліся з кіламетровым адрэзкам даволі хутка. Потым пазіцыі на стартавай стужцы занялі прадстаўнікі моцнай паловы. Тут розніца ў выніках, улічваючы больш доўгі маршрут, была адчувальная. Некаторыя адразу ўзвінцілі тэмп, іншыя выбралі больш павольную, але камфортную хуткасць. Па сутнасці, барацьба ішла ў большасці сваёй менавіта паміж тымі лёгкаатлетамі, якія ў выніку ўзняліся на другую і трэцюю прыступкі п’едэсталу.
Надышоў час вызначаць каманду-пераможца. Па агульных выніках, дзе ў прыярытэце было менавіта першынства сярод жанчын, перамогу святкавала каманда райвыканкама. Другое месца дасталася спартсменам ЦРБ, а дыпломы ІІІ ступені былі ўручаны супрацоўнікам РАНС.

Арцём ГУСЕЎ, фота аўтара.