Днямі карэспандэнты “ПН” наведалі палатачны спартыўна-аздараўленчы лагер з кругласутачным знаходжаннем установы “Дзіцяча-юнацкая спартыўная школа Петрыкаўскага раёна”. Як карысна сучасныя дзеці праводзяць дні без гаджэтаў і чаму вучацца ва ўмовах дзікай прыроды – у нашым матэрыяле.
Летнія канікулы – час не толькі для адпачынку, але і для ўмацавання здароўя, развіцця навыкаў і сапраўдных прыгод. Сёлета 25 выхаванцаў ДЮСШ адправіліся ва ўнікальны палатачны лагер кругласутачнага знаходжання, дзе сумяшчаюць спартыўныя трэніроўкі, турыстычныя паходы і заняткі на свежым паветры. Пагадзіцеся, што можа быць лепш у такія спякотныя, летнія дзянькі?
Рабяты размясціліся на трох стаянках. Тут яны могуць не толькі адпачыць на прыродзе, але і навучыцца быць самастойнымі, праверыць сваю сілу і цягавітасць у спартыўных спаборніцтвах. Кожны дзень у лагеры напоўнены актыўнымі відамі дзейнасці. Галоўны акцэнт – на спорт і здаровы лад жыцця.
Рабяты прымаюць удзел у эстафетах, гуляюць у футбол, валейбол, дартс, скачуць на скакалках, ёсць у дзяцей і настольныя гульні.
Асаблівая ўвага надаецца жыццю ў палявых умовах: устаноўка палатак, падрыхтоўка ежы на вогнішчы, захаванне чысціні і парадку ў лагеры.
– У асноўным у лагер залічаны выхаванцы ДЮСШ і дзеці, якія апынуліся ў цяжкай жыццёвай сітуацыі. Першы пункт у іх штодзённым распарадку – ранішняя зарадка. Затым яны ідуць на сняданак. Далей – спартыўныя заняткі, абед, спартыўныя спаборніцтвы, прагулкі на прыродзе.Таксама ў жніўні плануецца спартыўна-аздараўленчы лагер з дзённым знаходжаннем для спартсменаў – навучэнцаў установы, хто яшчэ не паспеў аздаравіцца гэтым летам, ёсць шанец запісацца, – распавёў Юрый Грэнка, начальнік палатачнага спартыўна-аздараўленчага лагера.
Арганізацыя палатачнага лагера – справа няпростая: патрабуецца ўладкаваць насцілы для палатак, душавыя, сталовую і медыцынскі пункт, а таксама забяспечыць штодзённую дастаўку пітной вады. Але менавіта такія ўмовы вучаць іх самастойнасці: рабяты дапамагаюць падтрымліваць парадак, удзельнічаюць у гаспадарчых справах і нават рыхтуюць простыя стравы на вогнішчы. Як адзначаюць трэнеры, гэта выхоўвае адказнасць і гуртуе дзяцей.
А яшчэ кожны вечар дзеці і дарослыя збіраюцца ля вогнішча, дзе спяваюць песні і расказваюць вясёлыя гісторыі. Пагутарыўшы з дзецьмі, зазірнуўшы ў іх шчаслівыя вочы, я зрабіла выснову: у лагеры ім вельмі падабаецца. Яшчэ б! Столькі сяброў, гульняў, побач заўсёды клапатлівыя трэнеры, смачная ежа, прыгатаваная на вогнішчы. Вось яно, сапраўднае лета!
Марыя ТАМКО,
фота аўтара.
Оставить комментарий