22 снежня сваё прафесійнае свята адзначаюць энергетыкі.
Напярэдадні падзеі мы наведалі калектыў Петрыкаўскага раёна электрычных сетак. Ад дзейнасці гэтых работнікаў залежыць бесперабойная праца прадпрыемстваў, арганізацый, устаноў, утульнасць і камфорт у нашых дамах.
Адзін з іх – дыспетчар РЭС Анатолій Вяргей. Усё прафесійнае жыццё героя, а гэта 36 гадоў, непарыўна звязана з энергетыкай. Хоць бацькі Анатолія Васільевіча працавалі ў сельскай гаспадарцы, і з дзяцінства перад ім быў прыклад працы на зямлі, юнак выбраў іншы прафесійны шлях. Пасля заканчэння роднай Макарыцкай базавай школы, ён накіраваўся ў Буда-Кашалёва, каб атрымаць прафесію тэхніка-электрамеханіка.
– Пасля заканчэння тэхнікума быў накіраваны на адпрацоўку ў Добрушскі раён, – успамінае энергетык. – Далей была служба ў войску ў Германіі. Пасля “дэмбелю” вярнуўся працягваць свой прафесійны шлях на малую радзіму. Спачатку працаваў на керамзітным заводзе, а 27 гадоў таму прыйшоў у якасці інжынера-электрыка на РЭС.
Яго праца – гэта сапраўднае сэрца электрычных сетак Петрыкаўшчыны.
– У мае абавязкі ўваходзіць упраўленне электрычнымі сеткамі і вытворчасць аператыўных пераключэнняў электрасеткі ў раёне. Праца, якая патрабуе пастаяннай увагі і хуткіх рашэнняў. Сваю работу люблю і цаню, – прызнаецца герой.
Анатолій Васільевіч адзначае, што ў калектыве электрасетак пануе атмасфера падтрымкі і ўзаемадапамогі, а кіраўніцтва шчыра перажывае за арганізацыю і людзей. Усё гэта дазваляе калектыву спраўляцца з любымі выклікамі.
“Калі здараецца пазаштатная сітуацыя, неабходна неадкладна аднавіць падачу электраэнергіі, работнікі РЭС выходзяць на працу, не зважаючы на свае планы і выхадныя. Наша галоўная мэта – забяспечыць стабільнае і надзейнае электразабеспячэнне раёна”
Сустрэча з Анатоліем Васільевічам, як гэта часта бывае, пачалася з прафесійных пытанняў, але закранула сферу асабістага. І тут адкрылася карціна сапраўднага сямейнага шчасця, якое будуецца на ўзаемнай падтрымцы, любові і клопаце. Анатолій Васільевіч расказвае, што Любоў Мікалаеўна, яго “надзейны тыл”. Працуе швачкай ва УП “Селюкі”, яна добрая гаспадыня, якая стварае ўтульнасць і цяпло ў нашым доме”.
– Яе клопат я адчуваю кожны дзень, – прызнаецца суразмоўца – Праяўляецца гэта ў смачных абедах, якія мая Любоў збірае з пяшчотай мне на змену, і цікавасці да маіх будняў энергетыка. Але і я не застаюся ўбаку: плачу жонцы той жа манетай, уважлівасцю і клопатам.
Іх дзеці ўжо выраслі і сталі самастойнымі. Дзмітрый і Сняжана, атрымаўшы вышэйшую адукацыю, знайшлі свой шлях у жыцці. Дзеці – вялікае шчасце для бацькоў.
Час за размовай з Анатоліем Васільевічам прайшоў хутка. Не абышлося і без пажаданняў ад героя ў адрас калег напярэдадні прафесійнага свята:
– Жадаю ўсім моцнага здароўя, невычарпальнай энергіі, поспехаў у нялёгкай, але такой важнай працы! Няхай у дамах землякоў заўсёды будзе святло і цяпло, а наша праца прыносіць задавальненне і гонар!
У 2025 годзе Петрыкаўскім РЭС была праве-дзена рэканструкцыя электрычных сетак у вёсках Муляроўка і Малыя Навасёлкі. На баланс прыняты сеткі чыгуначных шляхоў населеных пунктаў Капцэвічы, Муляроўка, Пціч. Праведзены капітальны рамонт на 38 аб’ектах. Рамонт ліній склаў 137,502 кіламетра.
Святлана СОБАЛЕВА, фота аўтара.
Оставить комментарий