Працоўны тыдзень Прэзі-дэнта Беларусі Аляксандра Лукашэнкі пачаўся з рабочай сустрэчы з міністрам грамадскай бяспекі В’етнама генерал-палкоўнікам Лыонг Там Куангам.
Падчас візіту дэлегацыі Мініс-тэрства грамадскай бяспекі В’етнама на чале з кіраўніком ведамства генерал-палкоўнікам Лыонг Там Куангам у Беларусь адбыўся шэраг мерапрыемстваў, звязаных з пашырэннем двухбаковага ўзаемадзеяння ў сілавым блоку. Госці нашай краіны наведалі спецыяльнае падраздзяленне па барацьбе з тэрарызмам “Алмаз”, адбылася сустрэча з кіраўніцтвам Міністэрства ўнутраных спраў Беларусі. У праграме візіту таксама значыліся перагаворы па лініі Дзяржаўнага сакратарыяту Савета бяспекі і Камітэта дзяржаўнай бяспекі. Галоўным мерапрыемствам візіту в’етнамскай дэлегацыі ў нашу краіну стала сустрэча міністра грамадскай бяспекі В’етнама з Прэзідэнтам Беларусі.
Найперш Аляксандр Лукашэнка павіншаваў госця Палаца Незалежнасці з вялікім святам для в’етнамскага народа – Днём Незалежнасці, які нядаўна адзначаўся ў гэтай краіне. “Гэта свята в’етнамцы заслужылі потам і крывёю, яны за яго змагаліся”, – падкрэсліў кіраўнік дзяржавы.
Прэзідэнт звярнуў увагу на тое, што В’етнам – гэта краіна не толькі ў Азіі, а і ў свеце, якая адбылася і хутка развіваецца.
“Паміж В’етнамам і Беларуссю ўстанавіліся вельмі цёплыя сяброўскія адносіны, – канстатаваў беларускі лідар. – Наша сяброўства з в’етнамскім народам заснавана на гераічных старонках барацьбы в’етнамскага народа за сваю незалежнасць ужо пасля Другой сусветнай вайны”.
Па яго словах, нашы суайчыннікі шмат працавалі ў В’етнаме. “Дапамагалі В’етнаму і ў вайне, і пасля вайны аднаўляць народную гаспадарку, – нагадаў Прэзідэнт. – Мы дагэтуль прытрымліваемся такой жа пазіцыі”.
Аляксандр Лукашэнка звярнуў увагу на тое, што нядаўна (у маі гэтага года) у В’етнаме адбылося важнае палітычнае мерапрыемства – выбары Прэзідэнта краіны. У жніўні То Лам быў выбраны яшчэ і на пост генеральнага сакратара Камуністычнай партыі В’етнама. Беларускі лідар папрасіў перадаць свайму калегу самыя цёплыя віншаванні і запрашэнне наведаць Беларусь у любы зручны для яго час.
Кажучы аб развіцці міжнародных адносін, Аляксандр Лукашэнка канстатаваў, што ў Беларусі і В’етнама падобныя погляды. “Мы – за шматпалярны свет, – падкрэсліў беларускі лідар. – І хочам мы гэтага або не, шматпалярны свет адбудзецца. У гэтай сувязі ў свеце, які моцна мяняецца, вельмі складаным свеце, неадназначным свеце, пытанні бяспекі выходзяць на першае месца. І я вельмі спа-дзяюся, што ваш візіт у Беларусь будзе садзейнічаць умацаванню нашых адносін і ў сферы бяспекі”.
Па словах Прэзідэнта, госць Палаца Незалежнасці добра ведае нашу дзяржаўную палітыку. “Мы, як і раней, прыхільныя вельмі добрым кірункам супрацоўніцтва Беларусі з В’етнамам, – дадаў кіраўнік дзяржавы. – Усё залежыць ад в’етнамскага боку. Мы будзем настолькі актыўныя ў нашых адносінах, наколькі гэта можа сабе дазволіць в’етнамскае кіраўніцтва”.
У сваю чаргу, міністр грамадскай бяспекі В’етнама пацвердзіў, што цяперашні візіт дэлегацыі В’етнама ў Рэспубліку Беларусь будзе садзейнічаць паглыбленню сяброўскіх адносін не толькі паміж дзвюма краінамі, а і сілавымі органамі Беларусі і В’етнама. Па яго словах, гэты візіт вельмі значымы. Лыонг Там Куанг перакананы, што ён стане добрым стымулам для ўмацавання адносін паміж сілавымі ведамствамі дзвюх краін.
Галіна КАЗАК. Фота БелТА.
Оставить комментарий