Ад навучэнкі да настаўніка

З кожным годам у нашым грамадстве ўсё больш людзей усведамляюць важнасць прафесіі настаўніка. Сярод іх – я, студэнтка Лоеўскага дзяржаўнага педагагічнага каледжа, якая з гонарам выбрала шлях педагога пачатковых класаў.

Маё рашэнне стаць настаўнікам было прадыктавана светлым вобразам першай настаўніцы, якая пакінула незгладжальны след у маім сэрцы і вызначыла мой жыццёвы шлях.
З ранняга дзяцінства я марыла пра тое, каб дзяліцца ведамі з дзецьмі. Мая першая настаўніца была для мяне сапраўдным прыкладам: яе клопат, цярпенне і ўменне знаходзіць агульную мову з кожным вучнем натхнілі мяне на выбар гэтай высакароднай прафесіі. Святлана Сямёнаўна не толькі навучала нас асновам ведаў, але і прывівала любоў да вучобы, дапамагаючы кожнаму раскрыць свой патэнцыял. Менавіта дзякуючы ёй я зразумела, як важна быць не проста настаўнікам, а настаўнікам і сябрам для дзяцей.
І вось мая мара амаль здзейснілася: я вучуся ў Лоеўскім дзяржаўным педагагічным каледжы, дзе атрымліваю неабходныя веды і навыкі для паспяховай працы ў школе. Кожны дзень я паглыбляюся ў вывучэнне методык выкладання, педагогікі, псіхалогіі і іншых дысцыплін, якія дапамогуць мне стаць кваліфікаваным спецыялістам. Я ўпэўнена, што гэтыя веды дапамогуць мне ў будучыні натхняць і падтрымліваць маіх вучняў.
Не так даўно ў мяне з’явіла-ся магчымасць прайсці перад-дыпломную практыку ў сваёй роднай Конкавіцкай школе, дзе я сама вучылася. Гэта ўнікальны вопыт, які дазваляе мне прымяніць тэарэтычныя веды на практыцы і ўзаемадзейнічаць з дзецьмі ў знаёмай атмасферы. Практыку я праходжу на базе трэцяга класа, у якім навучаецца пяць вучняў. Гэта дае мне магчымасць удзяляць кожнаму дзіцяці больш увагі і знаходзіць індывідуальны падыход да іх.
Я ўсё больш разумею, як важна быць падтрымкай для дзяцей, якой першая настаўніца была для мяне. Таму мая мэта – не толькі перадаць веды, але і дапамагчы дзецям развіць упэўненасць у сабе і любоў да вучобы.
Я цвёрда пераканана, што быць настаўнікам – гэта не проста прафесія, а пакліканне. Мая гісторыя – гэта толькі пачатак шляху, і я поўная рашучасці зрабіць усё магчымае, каб стаць добрым настаўнікам пачатковых класаў і перадаць набытыя веды і любоў да вучобы сваім вучням.

Кацярына Кулік.