Ёсць катэгорыя юнакоў і дзяўчат, з якімі асабліва прыемна сустракацца. Размова ідзе пра тых, хто пасля адпрацоўкі належнага тэрміну застаўся далей працаваць на першым працоўным месцы. Удвайне прыемна, калі гэта спецыяліст сельскай гаспадаркі.
Наталля Міцкевіч родам з вёскі Слабада. Дзяўчына пасля заканчэння Смятаніцкай сярэдняй школы вырашыла атрымаць прафесію, якая б ёй была блізкая і зразумелая. Выбар паў на Палескі дзяржаўны аграрны каледж: атрыманыя ва ўстанове веды прадугледжваюць працу на зямлі, клопат пра жывёл, што ў вясковай дзяўчыны не выклікала пытанняў. Пасля заканчэння навучання ў Калінкавічах атрымала дыплом заатэхніка і была накіравана на адпрацоўку ў свой родны раён – у КСУП “Кашэвічы”.
– Трэба прызнацца, што першы час было цяжка “ўцягвацца” ў вытворчасць. Дзякуй, кіраўніцтва гаспадаркі дапамагло з жыллём, а старэйшыя і вопытныя калегі пад-трымалі ў першых самастойных рашэннях, працоўных пачынаннях, – успамінае Наталля Уладзіміраўна. – Праца спачатку пужала, затым захапіла, а цяпер – гэта неабходнасць.
Відавочна, што ў маладога спецыяліста ў свой час склаўся правільны падыход да працы ў сельскай гаспадарцы. Яе старанні, адказны падыход заўважылі і прапанавалі пасаду загадчыцы МТК “720”. Суразмоўца кажа, што на ферме яна праводзіць не толькі рабочы час, але і частку вольнага, бо такая ў яе праца – жывёла патрабуе пастаяннага клопату.
Запыталася ў дзяўчыны, ці не шкадуе, што пасля адпрацоўкі засталася ў сельскай гаспадарцы, і якія пажаданні адрасуе сваім калегам, якія толькі пачынаюць сваю працоўную дзейнасць? Суразмоўца адказала шчыра:
– Лічу, што трэба працаваць па выбраннай прафесіі. Тым больш, калі чалавек ужо ўцягнуўся ў сваю справу, ведае яе спецыфіку – навошта нешта мяняць і пачынаць усё спачатку? Тым, хто толькі прыйшоў працаваць у сельскую гаспадарку, раю наступнае: не трэба думаць, што недзе і некаму лепей і лягчэй, чым табе. Кожная прафесія патрабуе ўседлівасці і адпаведных адносін. І памятайце: праца на зямлі любіць адказных і добрых людзей.
Святлана СОБАЛЕВА, фота аўтара.
Оставить комментарий