На базе сярэдняй школы № 1 прайшла ўрачыстая цырымонія ўзнагароджання пераможцаў раённага этапа рэспубліканскага конкурсу прафесійнага майстэрства “Настаўнік года Рэспублікі Беларусь”.
У гэтым годзе ў конкурсе ўдзельнічалі 19 самых смелых і таленавітых педагогаў.
Конкурс праходзіў у некалькі этапаў. На першым этапе педагогі праводзілі адкрыты ўрок па тэме, якая адпавядае каляндарна-тэматычнаму планіраванню, на другім – прадстаўлялі вопыт уласнай педагагічнай дзейнасці, раскрывалі напрамкі работы, ажыццяўлялі падрабязны аналіз педагагічных праблем і распавядалі пра свае ідэі.
Як адзначыла ў час прывітальнага слова начальнік аддзела адукацыі Людміла Жукавец, настаўнікі паказалі сябе на высокім узроўні, абазначыўшы вялікі патэнцыял для сваёй далейшай работы.
На цырымоніі ўзнагароджання прысутнічала і старшыня Петрыкаўскай раённай арганізацыі беларускага прафесійнага саюза работнікаў адукацыі і навукі Тамара Басюк.
Са словамі віншавання выступіла намеснік старшыні раённага выканаўчага камітэта, старшыня Петрыкаўскай раённай грамадскай арганізацыі “Беларускі саюз жанчын” Святлана Сянько. Яна адзначыла, што настаўнік – гэта чалавек з вялікай літары. Менавіта ён вучыць, натхняе, адкрывае свет дзіцяці. Ад педагога залежыць, на якой спецыяльнасці спыніцца вучань, якую карысць у будучым ён зможа прынесці грамадству.
Агучым імёны пераможцаў. У намінацыі “Выхавальнік дашкольнай адукацыі” перамагла настаўнік дзіцячага сада № 7 Ларыса Рэут, у намінацыі “Пачатковыя класы” – настаўнік пачатковых класаў сярэдняй школы № 1 Наталля Кабановіч, у намінацыі “Хімія, біялогія” – настаўнік хіміі і інфарматыкі Мышанскай сярэдняй школы Аксана Пашуціна, у намінацыі “Замежныя мовы” – настаўнік англійскай мовы сярэдняй школы № 1 Вольга Прыкота.
Пераможцы атрымалі граматы, кветкі, памятныя падарункі ад раённага камітэта галіновага прафсаюза і раённай грамадскай арганізацыі “Беларускі саюз жанчын”.
Сваімі ўражаннямі ад конкурсу падзялілася педагог Мышанскай сярэдняй школы Аксана Пашуціна:
“Для мяне ўдзел у конкурсе такога ўзроўню – ужо вялікая падзея. Засталася пад добрым уражаннем ад адкрытага ўрока, які дала ў гімназіі. Тэму старалася выбраць цікавую, спынілася на фосфары. З вучнямі таксама пашанцавала, хаця відаць было, што перажывалі не менш, чыя я”.
На пытанне, якім сёння павінен быць сучасны настаўнік, Аксана Васільеўна адказала: “Любіць тое, што ён выкладае і тых, каму выкладае!”
Наталля ПЕТРУШЭНКА.
Фота аўтара.
Оставить комментарий