З вышыні сваіх гадоў скажу, што ў школьныя гады мы, навучэнцы старэйшых класаў, з нецярпеннем чакалі суботы. А што прадказваў нам выхадны дзень? Вядома ж, тэматычную дыскатэку. Гэта былі не проста танцы пад вясёлую музыку. Гэта былі сустрэчы лідараў БРСМ з навучэнцамі па пэўнай тэматыцы. Лідарам удавалася пры дапамозе забаў данесці да падрастаючага пакалення сапраўды важную інфармацыю: пра карысць здаровага ладу жыцця і шкоду згубных звычак, пра тое, якім павінен быць грамадзянін Рэспублікі Беларусь, і як дзяржава спрыяе развіццю асобы чалавека. Дыскатэкі БРСМ заўсёды былі асаблівымі, са светламузыкай і нават дымам, а яшчэ яны часам называліся “Куставымі” – гэта значыць, што вучні некалькіх школ збіраліся ў адной. Апроч лекцый, на сустрэчах былі і конкурсныя праграмы да Дня маці, Дня настаўніка, да Новага года, да Дня закаханых…
Адзін з любімых і папулярных конкурсаў быў КВЗ. Заўсёды праходзіў з аншлагам. Увосень і ўвесну настаўнікі і навучэнцы сярэдніх школ раёна аднолькава з нецярпеннем чакалі турыстычны злёт.
Сёння мы паразмаўлялі з былым першым сакратаром райкама Беларускага Рэспубліканскага Саюза Моладзі Яўгенам Насекам, упэўнена, яго асоба для многіх – успаміны пра незабыўныя часы.
– Вядома, праца ў БРСМ пакінула незабыўны след у маім жыцці, – падзяліўся з намі Яўген Валянцінавіч. – Азіраючыся назад, разумееш, наколькі мы цікава і карысна бавілі час. Цяпер у многіх маіх памочнікаў-актывістаў ужо сем’і. Бывае, незнаёмыя мне людзі вітаюцца на вуліцы. Разумею, гэта БРСМаўскія часы адгукаюцца.
Яўгеній Насека скончыў першую гарадскую школу, затым паступіў у Мазырскі педагагічны ўніверсітэт імя Івана Шамякіна.
– Два гады я адпрацаваў настаўнікам фізікі, затым мне прапанавалі пасаду метадыста ў аддзеле адукацыі, а ўжо пасля – пасаду першага сакратара БРСМ. Вялікую дапамогу ў новай прафесіі аказала праца ў школе, я ведаў многіх актыўных вучняў і пачаў з імі ўзаемадзейнічаць. Усе конкурсы мы прадумвалі самі, тады яшчэ пра інтэрнэт і мабільныя тэлефоны ў раёне чулі адзінкі, таму даводзілася падключаць кемлівасць. Безумоўна, поспех нам быў забяспечаны самімі актывістамі, яны прапаноўвалі свае ідэі і шляхі іх рэалізацыі. Мы заўсёды пыталіся, чаго хоча моладзь і ішлі ёй насустрач.
За сваю маладзёжную працоўную дзейнасць Яўген Валянцінавіч быў узнагароджаны залатым значком БРСМ.
– Гэта вялікі гонар атрымаць такую адзнаку. На момант маёй працы – гэта 2007-2012 гады – гэта ўзнагарода была ў двух чалавек у вобласці адзін з іх я.
На пытанне, што для Яўгена Валянцінавіча БРСМ, герой адказаў:
– Па сутнасці – само жыццё. Мусіць, кожны з нас павінен пражыць такое юнацтва, каб потым пра яго ўспамінаць з настальгіяй. Сёння я бачу, што справа, распачатая намі столькі гадоў таму, актыўна працягваецца. Падабаецца прыходзіць па выхадных у гарадскі парк і бачыць на канцэртах таленавітую моладзь Петрыкаўшчыны. Прыемна, што наша справа жыве, развіваецца, набывае новыя формы ўзаемадзеяння з моладдзю. Ужо з’явіліся новыя лідары, якія перадаюць нашы каштоўнасці падлеткам. Віншую БРСМ з 20-годдзем і жадаю ўсім яе актывістам моцнага здароўя, поспехаў, крэатыўнасці, ініцыятывы. У БРСМ вас заўсёды пачуюць, не бойцеся прапаноў-ваць свае ідэі!
Наталля ПЕТРУШЭНКА.
Фота з асабістага архіва Яўгена НАСЕКІ.
Оставить комментарий