Капітальны рамонт шматпавярхоўкі і выдзяленне арэнднага жылля – пытанні, з якімі на прыём да старшыні райвыканкама Аляксандра Верамеева звярнуліся сёння жыхары раёна.
Так, заяўніц з райцэнтра непакоіць тэма капітальнага рамонту шматпавярховага дома, у якім пражываюць жанчыны. Рамонт наспеў даўно, гэта добра разумеюць не толькі жыхары дома, аднак і кіраўніцтва раёна, таму ў час прыёму прынята рашэнне ўключыць шматпавярхоўку ў план капітальнага рамонту на 2026 год. Па даручэнні кіраўніка раёна аддзелу ЖКГ, архітэктуры і будаўніцтва ў першым паўгоддзі неабходна заказаць у спецыялізаванай арганізацыі экспертызу, падрыхтаваць праектна-каштарысную дакументацыю і давесці да жыхароў шматпавярхоўкі аб’ёмы і срокі запланаваных работ. Такім чынам, праблема не толькі пачута, аднак акрэслены канкрэтны шлях яе вырашэння.
Па пытанні выдзялення арэнднага жылля звярнулася да старшыні райвыканкама жыхарка шматкватэрнага дома па вуліцы Камунальная. На працягу месяца заяўніцы будзе падрыхтаваны адказ з варыянтамі жылля, якое здаецца ДП “Петрыкаўскі райжылкамгас” у арэнду.
Па завяршэнні прыёму, кіраўнік раёна пазначыў, што для грамадзян падобны фармат сустрэчы – гэта магчымасць заявіць аб надзённай праблеме або прапанаваць магчымыя шляхі вырашэння пытанняў.
– І самае важнае тут – хутка і без цяганіны ўзяць агучаныя пытанні на аловак і, па магчымасці, тут жа вырашыць. Увогуле, прыёмы грамадзян дапамагаць бачыць слабыя месца і балявыя кропкі ў арганізацыя жыццядзейнасці насельніцтва раёна. Заўсёды арыентую сваіх намеснікаў на тое, што чалавеку трэба даваць аргументаваны адказ, а калі ёсць неабходнасць, то пабываць на месцы і вывучыць праблему дэталёва. Тады пытанні здымаюцца. Калі рашэнне прынята, то яго выкананне павінна быць даведзена да лагічнага канца, – рэзюмаваў старшыня райвыканкама Аляксандр Верамееў.
Галіна КАЗАК.
Фота аўтара.
Оставить комментарий