Веснавыя пасяўныя работы – напружаны і адказны час для механізатара. Яно і зразумела: пад улік варта браць мноства фактараў, асноўныя з якіх – срокі сяўбы і ўмовы надвор’я.
Апошнія сёлета – суцэльнае выпрабаванне: позняя вясна па сённяшні дзень не радуе ўстойлівым цяплом, больш таго, даж-джлівае надвор’е вельмі замінае правядзенню пасяўной. Асабліва цяжка гаспадаркам з тарфянымі палеткамі. Самі мяркуйце, залішняя вільгаць для такіх палеткаў – гэта фактычна прыпыненне пасяўных работ. А час прыспешвае і губляць яго нельга.
Сёлетняя пасяўная выйшла на фінішную прамую. З улікам умоў надвор’я, важэй заслугі механізатараў і большая наша ўдзячнасць за кожны ўзараны, прадыскаваны і засеяны гектар.
На мінулым тыдні мы наведаліся ў ААТ “Камаровічы”: адразу чатыры механізатары сельгаспрадпрыемства цвёрда замацавалі за сабой лідарскія пазіцыі ў сёлетнім раённым рэйтынгу пасяўной.
У час сустрэчы з лідарамі пасяўной, старшыня Петрыкаўскага раённага камітэта прафсаюзаў работнікаў аграпрамысловага комплекса Галіна Курловіч падзякавала механізатарам прадпрыемства за плённую працу і высокія вынікі, дасягнутыя ў ходзе пасяўной кампаніі 2021 года, уручыла лепшым механізатарам гаспадаркі лісты падзякі ад райкама прафсаюзаў і каштоўныя падарункі (на фота).
Як адзначыла ў час размовы кіраўнік гаспадаркі Ларыса Талецкая, нават у такіх няпростых умовах з запланаванымі задачамі справілася.
Сёлета сельгаспрадпрыемствам пад авёс адведзена плошча ў 702 гектары, з іх на зерне пойдзе 400 гектараў. Кукуруза пасеяна на 853 гектарах плошчы з 900 запланаваных. Угнаенні ўнесены на 75% пасяўных плошчаў. 28 тысяч тон арганікі пайшло пад веснавы сеў. Усе віды веснавых пасяўных работ ажыццявілі ўласнымі сродкамі і сіламі. На гэтым тыдні пасяўныя работы плануецца завяршыць. Аднак пачнецца не менш адказны і гарачы час – нарыхтоўка кармоў. Але, дзякуючы зладжанай рабоце каманды механізатараў, Ларыса Адамаўна і за гэты ўчастак работы хваляванняў асаблівых не мае. Механізатары, як даказвае раённая статыстыка пасяўной, у гаспадарцы вопытныя, адказныя, працалюбівыя і старанныя. Тэхніка абслугоўваецца своечасова, таму і працуе без перабояў.
Кіраўнік гаспадаркі неаднаразова ў час размовы падкрэслівала лепшыя прафесійныя і чалавечыя якасці сваіх механізатараў.
Як адзначылі ва ўпраўленні сельскай гаспадаркі і харчавання райвыканкама, справы ў сельгаспрадпрыества ААТ “Камаровічы” ідуць добра: заработная плата годная і выплачваецца своечасова, з палівам таксама праблем няма.
Пажадаем аграпрамысловаму комплексу раёна спрыяльных умоў надвор’я, а з усім астатнім яны справяцца!
Галіна КАЗАК.
Фота аўтара.
Оставить комментарий