Напрыканцы мінулага тыдня ў абласным цэнтры вызначылі пераможцаў штогадовага абласнога спаборніцтва сярод рэдакцый друкаваных, тэлевізійных, радыёвяшчальных сродкаў масавай інфармацыі, інтэрнэт-рэсурсаў, сеткавых выданняў.
У грамадска-культурным цэнтры ўзнагародзілі тых, хто па выніках мінулага года яскрава, эмацыйна выбудоўваў дыялог з гледачом і чытачом – пісаў артыкулы, здымаў сюжэты, вёў эфіры. Губернатар Іван Крупко, віншуючы лепшых, адзначыў: “Журналістыка – прафесія дзяржаўная, а журналіст уплывае на фарміраванне грамадскай думкі. Асаблівасць прафесіі сёння – пераход у інтэрнэт. А гэта патрабуе асаблівай адказнасці, аператыўнасці, умення падаваць інфармацыю коратка і без скажэння фактаў. І барацьба з фэйкамі найболей актуальная. Акрамя таго, СМІ даюць нам адваротную сувязь пра тое, што адбываецца ў рэгіёнах, паказваюць і праблемы, і радасці”.
У межах журналісцкай урачыстасці адбылося ўшанаванне самых актыўных удзельнікаў абласнога творчага праекта маладых юных карэспандэнтаў Гомельшчыны “Памяць пакаленняў”. Удзельнікі праекта, юнкары рэгіянальных сродкаў масавай інфармацыі, далучыліся да стварэння відэатэкі памятных мясцін і пахаванняў часоў Вялікай Айчыннай вайны на тэрыторыі Гомельшчыны.
Так, у ліку пяці ганараваных і наша зямлячка. Падзякай губернатара вобласці Івана Крупко адзначана дзесяцікласніца Бабуніцкай сярэдняй школы Паліна Глушко. Дзяўчына разам з Андрэем Раўкоўскім пад кіраўніцтвам бібліятэкара Наталлі Стракач прадставілі для ўдзелу ў абласным праекце відэаролік, у якім распавялі пра памятныя месцы часоў Вялікай Айчыннай вайны, размешчаныя на тэрыторыі аграгарадка Бабунічы. Як адзначыла Паліна, удзел у абласным праекце стаў для яе цудоўнай магчымасцю для самарэалізацыі і дэманстрацыі свайго стаўлення да па-дзей ваеннага ліхалецця, а падзяка губернатара – прыемная ўзнагарода і стымул для далейшай творчасці. Наталля Стракач, ідэйны натхняльнік маладзёжнага дуэта, пераканана, што памяць пра гераічныя і трагічныя старонкі вайны – важны момант патрыятычнага выхавання моладзі.
Абласны праект працягваецца, далучайцеся. Спасылкі на відэаматэрыялы з хэштэгамі #памяцьпраПерамогу, #уаб’ектывеюнкара, #юнкарыпамятаюць дасылайце на наш электронны адрас info@petrikov.by.
Галіна КАЗАК, фота “ГП”.
Оставить комментарий