Кожная гаспадарка славіцца сваімі  перадавікамі. І гэты гонар у калектывах яшчэ большы, калі іх працаўнікі знаходзяцца на першых прыступках раённага п’едэстала.

Адзін з такіх – механізатар з КСУП імя Ульянава Юрый Лыскоў. Яго імя добра вядома нашым чытачам па звестках райкама прафсаюза работнікаў АПК, што друкаваліся ў раёнцы кожны тыдзень. Юрый Валянцінавіч увесь час у сезон нарыхтоўкі кармоў быў лепшы ў раёне па перавозцы зялёнай масы кукурузы. Так, трактарам “Беларус-1523” у счэпцы з прычэпам “ПСТ-17” ён перавёз каля 5 тысяч тон масы. Дзякуючы гэтаму некалькі тыдняў таму з рук старшыні райкама прафсаюза Ірыны Берднік ён атрымаў ліст падзякі за добрасумленную працу і падарунак.

На такіх трымаецца  прадпрыемства
Юрый Лыскоў

Акрамя ўсяго, Юрый Лыскоў неаднойчы займаў прызавыя месцы на сяўбе азімых і яравых культур, ворыве глебы.

Не менш вопыту і прафесіяналізму і ў механізатара Віталя Кананчука. Зусім нядаўна ён на кормаўборачным камбайне “КВК-800” убіраў кукурузу на сілас. Ды і ўвогуле большай часткай Віталь Уладзіміравіч заняты на нарыхтоўцы кармоў, бо ведае гэту справу выдатна.

На такіх трымаецца  прадпрыемства
Віталь Кананчук

Механізатары пільна сочаць за даручанай ім тэхнікай, якасна рыхтуюць яе да палявых работ, каб своечасова і без паломак правесці сяўбу, жніво, нарыхтоўку кармоў.

Віншуем механізатараў з прафесійным святам. Жадаем моцнага здароўя, дабрабыту, ладу і паразумення ў сем’ях, а таксама толькі перадавых паказчыкаў як у гаспадарцы, так і ў раёне.

 

Заўсёды на добрым рахунку ў КСУП  “Капаткевічы” механізатар Сяргей Коль. Сам Сяргей Уладзіміравіч працяглы час жыў у суседняй Украіне, там пажаніўся. Бацька ж яго родам з Міхедавіч і неяк пераманіў сына на радзіму. Вось ужо больш 20 гадоў ён у Капаткевічах.

На такіх трымаецца  прадпрыемства
Сяргей Коль

Сяргей Коль займаецца рознай работай: трактарам “Беларус-82” чысціць хлявы, прасуе і звозіць сена і  салому. У напружаны перыяд у счэпцы з “БДТ-3” дыскуе глебу пад сяўбу зерневых. Менавіта на апошніх работах, як адзначыў кіраўнік гаспадаркі Аляксандр Пінчук, перадавы механізатар устанавіў свой асабісты рэкорд – перавысіў дзённую выпрацоўку аж у тры разы. А гэта значыць, што на сваім агрэгаце за дзень Сяргей Уладзіміравіч рыхтаваў  35 гектараў глебы. Не ведаючы стомы, працаваў у дзве змены.

Працаваць у гаспадарцы Сяргею Уладзіміравічу падабаецца, заробкамі задаволены. А да таго, што літаральна ўвесь час ён праводзіць на працы, нярэдка без выхадных, у сям’і прызвычаіліся. Хаця і ў такія напружаныя моманты ён знаходзіць час для сямейных клопатаў і выхавання трох дзяцей.

На такіх трымаецца  прадпрыемства
Мікалай Савурын

Больш за 20 гадоў працуе механізатарам у гаспадарцы Мікалай Савурын. Яго прозвішча нярэдка значыцца сярод перадавых працаўнікоў сельскай гаспадаркі раёна ў назапашванні кармоў і ўборцы зерневых. Акрамя гэтага Мікалай Мікалаевіч таксама займаецца ўнясеннем угнаенняў, уборкай кукурузы і шматгадовых траў,  іншымі сельскагаспадарчымі работамі, перавышаючы нормы дзённай выпрацоўкі ў два разы і болей.

– Гэта нашы добрасумленныя, адказныя працаўнікі, якія ведаюць кошт сваёй рабоце. На такіх, як Сяргей Коль і Мікалай Савурын, і трымаецца гаспадарка, – менавіта такія словы сказаў на адрас механізатараў іх кіраўнік Аляксандр Пінчук.

 

Дзмітрый АЛЯКСАНДРАЎ, фота аўтара.

Оставить комментарий

avatar
  Подписаться  
Уведомление о