Штогод 14 жніўня праваслаўныя хрысціяне святкуюць паходжанне Дрэў Жыватворчага Крыжа Гасподняга і Хрышчэнне Русі, якое было ў гэты дзень у 988 годзе. Па традыцыі ў храмах выносяць крыж для пакланення, а таксама праводзяць асвячэнне мёду і вады. У народзе свята называюць Мядовы Спас.

Мядовы спас – салодкі час

У гэты дзень пачынаецца Успенскі пост, які працягнецца да 28 жніўня, да свята Успення Святой Багародзіцы. Сам пост строгі: у яго такі ж статус, як у Вялікага паста. Вернікі павінны цалкам устрымлівацца ад ежы жывёльнага паходжання.
Сімваламі гэтага свята з’яўляецца мак, які раней клалі каля ікон і захоўвалі да вясны ці выкарыстоўвалі для каляднай куцці, і мёд. Менавіта першы Спас лічыцца пачаткам збору мёду.
Гэта свята – першае ў чарадзе царкоўных дат, калі вернікі прыносяць у храм плён працы сваёй. 14 жніўня – мёд, 19 – сада-віну, 29 – пшаніцу і арэхі. Адсюль і назвы святаў: Мядовы, Яблычны і Арэхавы Спасы.
Ёсць многа прыкмет на Макавея. Напрыклад, нельга ладзіць шумнае святкаванне, гучна гаварыць, бо гэта можа спалохаць пчол. Нельга прыбіраць у хаце ці на гародзе. Асабліва непажадана было рабіць нядобрае, бо верылі, што яно вернецца ў сто разоў большай бядой.
Можна і трэба купацца, бо вада ў гэты дзень надае сілы. На Макавея было прынята купаць жывёлу.
Абавязкова трэба спячы бліны з мёдам і булкі з макам.
Трэба асвечаным макам пасыпаць куты хаты. Гэта дапаможа абараніць сям’ю ад пошасцяў. Каб дзіця ўвесь год не хварэла, у гэты дзень кладуць галоўку маку пад яго падушку.
14 жніўня Царква ўспамінае сем пакутнікаў Макавейскіх. Нагадваем, што ў кашэвіцкай Успенскай царкве ў нашым раёне ёсць унікальная, пісаная па дрэве, старажытная цудатворная ікона сямі святых пакутнікаў Макавеяў, якой моляцца бацькі пра сваіх дзяцей. Наведайцеся, пакланіцеся.

М. ЯГОРАВА.
Фота Арцёма ГУСЕВА.

Оставить комментарий

avatar
  Подписаться  
Уведомление о