Пры падтрымцы УЕФА ў Рэспубліцы Беларусь развіваецца сацыяльна-спартыўны праект “Мой школьны футбольны клуб”. Ён накіраваны на развіццё масавага футбола ва ўстановах адукацыі краіны.
На сустрэчу з навучэнцамі гімназіі днямі прыехалі кіраўнік сацыяльна-спартыўнага праекта Вячаслаў Антоненка і начальнік аддзела масавага футбола Асацыяцыі “Беларуская федэрацыя футбола” Віталь Валасюк.
Як адзначыў Вячаслаў Антоненка, “Мой школьны футбольны клуб” – гэта сацыяльны праект. Ён накіраваны на развіццё менавіта масавага аматарскага футбола. Усе жадаючыя, незалежна ад здольнасцяў і абмежаванняў, змогуць знайсці сваё месца ў гульні.
– У чым каштоўнасць такіх сустрэч? Сітуацыя ў школах часам такая, што ў аснову ставіцца вынік: галы, ачкі, прызавое месца. Нам жа важна зрабіць так, каб аматарскі футбол быў асновай, з якой потым вырастаюць сапраўдныя футбалісты, – сказаў Віталь Валасюк. – Праект уключае ў сябе праходжанне своеасаблівай паласы перашкод з мячом, уменне перакідаць яго праз бар’ер. На фінальным этапе дзіцяці неабходна забіць мяч у пэўную частку варот (за кожны кут можна атрымаць адпаведную колькасць балаў). Мы падказваем дзецям, як зрабіць гэта правільна, а заадно глядзім, хто з дзяцей ужо валодае тэхнікай забівання мяча.
Агучым імёны пераможцаў спартыўных спаборніцтваў праекта. Першае месца заняў Макар Бяляеў, набраўшы рэкордную колькасць балаў за ўсю гісторыю праекта – 288.
Другім стаў Елізар Хаменя з 275 баламі, трэцім – Цімафей Фіндзюкевіч з 264 баламі.
У камандзе дзяўчынак найлепшай стала Марыя Сюняева, набраўшы 188 балаў. На другім месцы Анастасія Руднічэнка з сумай балаў 167. Трэцяй стала Кіра Шабалтас з сумай балаў 149.
Мяркуючы па эмоцыях дзяцей, спаборніцтвы прайшлі на “ўра”, пакінуўшы пасля сябе масу незабыўных уражанняў і вопыту.
Наталля ПЕТРУШЭНКА.
Фота аўтара.
Оставить комментарий