У зале райвыканкама адбылося ўрачыстае ўручэнне пашпартоў юнакам і дзяўчатам Петрыкаўшчыны

У Дзень Канстытуцыі, 15 сакавіка, у вялікай зале райвыканкама адбылося ўрачыстае ўручэнне пашпартоў юнакам і дзяўчатам Петрыкаўшчыны.

Апрача маладых людзей, што завіталі на мерапрыемства за галоўным дакументам грамадзяніна, у зале прысутнічалі і іх малодшыя сябры, а таксама юныя музыканты, што віншавалі прысутных сваімі творчымі падарункамі.
Урачыстасць распачалася прамовай намесніка старшыні райвыканкама Святланы Сянько: “Няўхільна прытрымліваючыся канстытуцыйных прынцыпаў і нормаў, мы стварылі ўмовы для кансалідацыі грамадства, станаўлення прававой і сацыяльнай дзяржавы. Памятайце, што з моманту атрымання пашпарту ў вас будуць не толькі правы, а і адказнасць за свае ўчынкі. Усім прысутным жадаю, каб вы былі годнымі грамадзянамі Рэспублікі Беларусь. Ідзіце наперад, ніколі не здавайцеся, вам абавязкова дапамогуць на роднай беларускай зямлі”.

Пасля гэтых слоў распачалося ўручэнне пашпартоў. Першай сярод двух дзясяткаў юнакоў і дзяўчат дакумент атрымала Наталля Батан, якая ў гэты дзень святкавала яшчэ і дзень нараджэння.

Са словам ад моладзі выступіў Яраслаў Логінаў: “Сёння мы атрымалі важны афіцыйны дакумент. На працягу часу ў ім з’явяцца адзнакі пра сямейнае становішча, дзяцей, але пакуль ён чысты, а перад намі адкратыя ўсе магчымасці. Але для таго, каб імі скарыстацца, нам трэба добра вучыцца, атрымаць прафесію і быць годнымі спецыялістамі. Абяцаем, што прыкладзем усе намаганні, каб наша краіна і далей развівалася. Мы будзем берагчы сваю Радзіму, памнажаць яе багацці і славу”.

Звярнуліся да маладога пакалення і прадстаўнікі грамадскіх арганізацый. Так, старшыня райарганізацыі Беларускага аб’яднання ветэранаў Уладзімір Жукавец пазначыў: “Жыццё – не дзіцячая гульня, дзе заўсёды можна распачаць усё нанова. Таму бярыце ад жыцця ўсё лепшае і не забывайцеся пра абавязкі грамадзяніна”.

Ну і, канешне, з пажаданнямі поспехаў ва ўсіх пачынаннях звярнулася да моладзі першы сакратар райкама БРСМ Васіліна Маслава: “Мы заўсёды гатовыя дапамагчы вам ва ўсіх ініцыятывах. Таму памятайце, што ўжо сёння вы можаце зрабіць унёсак у справу развіцця краіны. Ідзіце па жыцці ўпэўнена, няхай вас не пакідаюць смеласць, рашучасць, годнасць”.
Пасля некалькіх творчых падарункаў ад юных артыстаў цырымонія скончылася фатаграфаваннем на памяць.

Арцём ГУСЕЎ.
Фота аўтара.