Фарватар кубка адзначаны рэкордным лікам

У нядзелю, 22 студзеня, у спартыўнай зале ДЮСШ Петрыкаўскага раёна прайшлі 2-гі і 3-ці туры Кубка па міні-футболе, прысвечанага памяці Уладзіміра Рыжанкова. Спартыўны ўікэнд быў багаты на цікавыя супрацьстаянні і эмоцыі.

Першымі на пляцоўку выйшлі футбалісты міні-футбольнага клуба “Шапэн” і адзін са спартыўных калектываў Петрыкаўскага руда-ўпраўлення “Гарняк-2”. Гульня была напружанай, не абышлося без выдаленняў. “Шапэн” здолеў выйсці наперад і мінімальна перамагчы сапернікаў з лікам 3:2.
У гульні яшчэ адной каманды калійшчыкаў з футбалістамі петрыкаўскага лясгасу адразу вызначыўся фаварыт. Без асаблівых праблем каманда “Гарняк-1” рэалізоўвала мноства момантаў, а з другой паловы гульні, “салевікі” ўвогуле пачалі штурмаваць не столькі хутка і востра, колькі творча: у вароты ляцелі філігранныя “матылькі”, часцяком футбалісты адыгрывалі на апераджэнне, ці дасылалі мяч у вароты хіба не з нулявога кута: 13:1 на карысць “Гарняка-1”.
Даволі роўна праходзіла гульня паміж дружынамі “Ураджай” і “Шапэн”. Але “ўраджаеўцы” ў самы адказны момант здолелі стрымаць ціск апанентаў, у якіх не ляцела ў вароты ў той сустрэчы, і выйсці наперад, планамерна павялічваючы адрыў. Гульня прайшла на высокіх абаротах, глядзелася на адным подыху і скончылася з лікам 5:2.
“Калійнае дэрбі” не апраўдала чакання паглядзець на прынцыповую барацьбу. Футбалісты “Гарняк-1” расправіліся з калегамі з “Гарняка-2” амаль так жа лёгка, як і напярэдадні з супрацоўнікамі лесаахоўнай службы – 13:2.
У апошніх дзвюх сустрэчах на пляцоўцы дэманстравалі свае здольнасці футбалісты навасёлкаўскай дружыны “Золак”, за якую выступалі ў гэты раз чатыры петрыкаўчаніна і адзін ураджэнец Курыцічаў. Матч з лясгасам распачаўся бадзёра, “вяскоўцы” забілі хуткі гол, але апаненты расставілі ўсе кропкі над “і” і завяршылі гульню на сваю карысць з лікам 6:1.
А ў апошнім супрацьстаянні футбольнага дня ўвогуле быў зафіксаваны рэкордны лік! Раней больш моцныя каманды, пры яўнай дамінацыі ў гульні, забівалі крыху больш дзясятка мячоў, але ў гэты раз “ураджаеўцы” вырашылі скарыстацца ўсімі магчымасцямі і завяршылі сустрэчу з вынікам 21:4.
У нядзелю, 29 студзеня, адбудуцца апошнія 4-ты і 5-ты туры спаборніцтваў, дзе і будуць выяўленыя чэмпіёны Кубка.

Арцём ГУСЕЎ, фота аўтара.