Мы працягваем цыкл матэрыялаў, прысвечаных маладым людзям, якія з задавальненнем працуюць у Петрыкаўскім раёне.
Сяргей Кананчук прыехаў у Петрыкаўскі раён з вёскі Сямігосцічы Столінскага раёна Брэсцкай вобласці. Па словах хлопца, тут, на Палессі, ёсць усё неабходнае для жыцця сучаснага чалавека. Малады аграном знайшоў у зацішным кутку нашай малой радзімы сябе – праца па душы, з магчымасцю кар’ернага росту, жыллё, якім забяспечвае мясцовае прадпрыемства сваіх працаўнікоў, і, галоўнае, велічная прырода, якая нікога не пакідае абыякавым.
– Я нарадзіўся і вырас у працоўнай сям’і. Бацькі ўсё жыццё займаліся і працягваюць займацца фермерствам, парнік 10 сотак маюць, 30 сотак адведзена на вырошчванне капусты.
Сяргей удакладняе, актыўны сезон працы на палях пачынаецца ў бацькоў з лютага, а заканчваецца ў кастрычніку. Не пакладаючы рук, бацькі працуюць ад світання да заходу. Перапынак толькі на тры месяцы. У гэтым годзе яны плануюць пасеяць 15 сотак салодкай кукурузы. Што паспеюць выгадаваць і прадаць, тым сабе на жыццё і зарабляюць.
– У мяне ўжо ў 9 класе быў уласны парнік з агуркамі на 3 соткі, а ў 11 класе – на 8 сотак, – працягвае герой. – З дзяцінства мне падабалася займацца вырошчваннем гародніны. Працаваць на зямлі я люблю.
Зразумела, пазіраючы, як працуюць мама і тата, Сергей пайшоў па іх слядах. І, увогуле, у яго сям’і з пакалення ў пакаленне ўсе працавалі на зямлі.
– Пасля заканчэння сярэдняй школы паступіў у Палескі дзяржаўны аграрны каледж на агранома. Вырашыў не спыняцца на дасягнутым і паступіў у Горацкую акадэмію на Агранамічны факультэт. У 2019 годзе паступіў завочна на выкладчыцкую дзейнасць асноўнай адукацыі, яе скончыў у 2021 годзе, затым быў размеркаваны ў ААТ “Агра-Ляскавічы” аграномам-аграхімікам, а ў лістападзе 2021 года стаў галоўным аграномам гэтага прадпрыемства. Задача – забяспечыць гаспадарку кармамі, зернефуражом, насенным матэрыялам.
– У маёй справе зусім няма дробязяў. Памылка ці пралік, у якой-небудзь частцы гэтай працы, можа ці перакрэсліць усе намаганні, ці істотна зменшыць канчатковы вынік. У сувязі з гэтым з ранняй вясны і да глыбокай восені аграном знаходзіцца ў пастаянным разумовым працэсе і сур’ёзным напружанні, – распавядае пра нюансы работы суразмоўца. – Аграном – гэта чалавек, які робіць усё магчымае для забеспячэння максімальнага ўра-джаю на полі. Ён і забяспечвае правядзенне пасяўной кампаніі, і абарону ад хвароб, насякомых, пустазелля і іншых шкоднікаў, і прымяняе ўгнаенні. Прасцей кажучы, робіць усё, пачынаючы ад узворвання поля і заканчваючы ўраджаем.
На пытанне, што найбольш падабаецца Сяргею ў яго працы, адказаў:
– Дамагацца вынікаў, працаваць з разумелымі людзьмі, даведвацца пра новае, ставіць вопыты.
Сяргей у сваёй рабоце імкнецца павысіць ураджайнасць з кожным годам. Кажа, пакуль гэта атрымоўваецца.
Генеральны дырэктар ДПУ “НП “Прыпяцкі” Юрый Апанавіч уручыў Сяргею і яго таварышам па кватэры (Андрэй Шчэмялёў працуе у нацпарку, Дзяніс Чарняўскі – у лясніцтве) пральную машыну.
– Вельмі, дарэчы, неабходна яна нам была. Так што дзякуй вялікі!
У канцы размовы Сяргей адзначыў, што агарагодак Ляскавічы знакаміты сваімі краявідамі, сюды прыязджаюць спецыялісты з розных куткоў Беларусі.
– Тут хапае месцаў для працы, ёсць, дзе і адпачыць. Пра планы на будучыню пакуль нічога скажу. Усё ж жыццё пераменлівае.
Наталля ЧАРНЯЎСКАЯ.
Оставить комментарий