Карэспандэнт “раёнкі” разам з супрацоўнікам міліцыі і інструктарам-метадыстам па спартыўна-масавай і фізкультурна-аздараўленчай рабоце ФСК “Ураджай” наведалі некаторыя вадаёмы ў межах райцэнтра, каб прадухіліць магчымыя парушэнні правілаў паводзін на вадзе.
Прыпыніўшыся на гарадскім пляжы № 2, што знаходзіцца бліз парома, супрацоўнік міліцыі адразу звярнуў увагу на кампанію адпачываючых хлопцаў, якія знаходзіліся крыху ў баку ад месца адпачынку. Позірк праваахоўніка затрымаўся на бутэльцы з цёмнай вадкасцю, але, як весветлілася, спіртных напояў кампанія не ўжывала, паталяла смагу квасам.
У астатнім да адпачываючых на пляжы пытанняў не ўзнікла, да і людзей было ў гэты дзень, кажучы шчыра, крыху больш за дзясятак.
На першым гарадскім пляжы назіралася падобная карціна. Наведвальнікаў тут было крыху болей – у асноўным дзеці разам з матулямі ці бабулямі, таму пра злоўжыванне спіртным ці іншыя супрацьпраўныя дзеянні тут і гаворкі не вялося. Пацікавіліся ў выратавальнікаў пра абстаноўку, нам паведамілі, што першы гарадскі пляж у асноўным аблюбавалі людзі сямейныя, пэўна, за крокавую даступнасць, пакатае дно і кругласутачны нагляд выратавальнай станцыі. Бацькі, вядома, пільна сочаць за дзецьмі і, увогуле, ніякіх праблем з такімі адпачываючымі не ўзнікае.
На затоцы Бычок аматараў адпачынку мы не знайшлі – яно і не дзіва, улічваючы што на гарадскіх пляжах было не шматлюдна. Будзем спадзявацца, што незалежна ад колькасці наведвальнікаў на мясцовых вадаёмах, адпачываючыя не забудуцца пра правілы бяспекі.
Арцём ГУСЕЎ.
Фота аўтара.
Оставить комментарий