60 гадоў другой гарадской школе: свята гісторыі і будучыні

Урачыстая атмасфера пануе сёння ў сценах другой гарадской школы, якая адзначае свой 60-гадовы юбілей. На святочным мерапрыемстве сабраліся ганаровыя госці, ветэраны педагагічнай працы, настаўнікі, вучні, сябры школы – усе, хто мае дачыненне да гісторыі і сучаснасці гэтай навучальнай установы.

Пачалося мерапрыемства з віншавальных слоў. Першай на сцэну паднялася намеснік старшыні райвыканкама Наталля Ходзька. Яна шчыра павіншавала прысутных з юбілеем школы, адзначыўшы яе значны ўклад у адукацыю і выхаванне падрастаючага пакалення. У знак падтрымкі і развіцця інфармацыйных тэхналогій у адукацыйным працэсе, Наталля Мікалаеўна ўручыла дырэктару школы Таццяне Зенкевіч сертыфікат на мэблю для кампю’тарнага класа.

Асаблівую ўвагу прадстаўнік улады надала ветэранам педагагічнай працы і работнікам школы, якія сваёй самаадданай працай унеслі неацэнны ўклад у развіццё установы адукацыі. За шматгадовую працу і адданасць прафесіі лісты Падзякі ад райвыканкама атрымалі Уладзімір Уладзіміравіч Куцько, Антаніна Фёдараўна Пырко, Ларыса Леанідаўна Купрэй, Сяргей Леанідавіч Паболелаў, Галіна Пятроўна Грыневіч Гэтыя людзі – гонар школы, прыклад для маладога пакалення настаўнікаў. Іх вопыт і мудрасць дапамагаюць школе ісці наперад і дасягаць новых вышынь.

Віншаванні з нагоды 60-годдзя прагучалі ад начальніка аддзела адукацыі райвыканкама Людмілы Жукавец і старшыні раённай арганізацыі прафсаюза работнікаў адукацыі і навукі Тамары Басюк. Людміла Мікалаеўна і Тамара Мікалаеўна ў сваіх выступленнях адзначылі значны ўклад установы ў развіццё адукацыі ў раёне, падкрэслілі важнасць працы педагогаў і пажадалі далейшых поспехаў у выхаванні падрастаючага пакалення. У якасці падарунка ад аддзела адукацыі ўстанове быў уручаны сертыфікат. Асаблівым момантам стала ўзнагароджанне педагогаў, якія сваёй шматгадовай і добрасумленнай працай заслужылі павагу калег і любоў вучняў.